Ծերակոյտը Այսօր Սուրիոյ Դէմ Հարուածի Հարցով Քննարկում Կը Կատարէ. Ասատ. «Մեր Դաշնակիցները
Պիտի Հակադարձեն, Եթէ Սուրիոյ Դէմ Յարձակում Շղթայազերծուի»
Միացեալ Նահանգներու Ծերակոյտը այսօր Պէյրութի ժամանակացոյցով երեկոյեան ժամը 07:00-ին
պիտի քննարկէ Սպիտակ տան Սուրիոյ դէմ 60 օր տեւողութեամբ զինուորական հարուած հասցնելու
արտօնութիւն տալու Ծերակոյտի միջազգային յարաբերութեանց յանձնախումբին պատրաստած բանաձեւին
շուրջ: Նշենք, որ բանաձեւը յանձնախումբին մէջ որդեգրուած էր 10 թեր եւ 7 դէմ քուէներով:
Ներկայացուցիչներու տան մէջ հանրապետական մեծամասնութեան ղեկավարը յայտարարեց, որ Ներկայացուցիչներու
տունը Սուրիոյ հարցին շուրջ քուէարկութիւն պիտի կատարէ յառաջիկայ 2 շաբթուան ընթացքին: Իսրայէլեան
պատկերասփիւռի 10-րդ կայանը շաբաթ օր հաղորդեց, որ Սպիտակ տունը Սուրիոյ դէմ հարուածին
հրամանը պիտի տայ Ծերակոյտին կողմէ քուէարկութեան աւարտէն անմիջապէս ետք` առանց սպասելու
Ներկայացուցիչներու տան քուէարկութեան: Իսրայէլեան «Ետիոթ Ահրոնոթ» օրաթերթը հաղորդեց,
որ հրէական լոպին Քոնկրեսին վրայ ճնշում պիտի բանեցնէ, որպէսզի Սուրիոյ դէմ հարուածին
թեր քուէարկէ: Միացեալ Նահանգներու արտաքին գործոց նախարարութիւնը յայտնեց, որ Քոնկրեսին
մէջ Սուրիոյ դէմ հարուածի հարցին նկատմամբ ուղղուածութիւնը մինչեւ հիմա դրական կը թուի:
Միացեալ Նահանգներու արտաքին գործոց նախարար Ճոն Քերրի շաբաթ օր ընդգծեց, որ Օպամա Սուրիոյ
դէմ հարուածներ հրամայելու լիազօրութիւնը ունի, նոյնիսկ եթէ Քոնկրեսը որոշէ անոր կանաչ
լոյս չտալ: Նախագահ Պարաք Օպամա իր կարգին շաբաթ օր Քոնկրեսին կոչ ուղղեց Սուրիոյ դէմ
հարուածին աջակցելու` զգուշացնելով քիմիական զէնքերուն ահաբեկիչներուն ձեռքը անցնելէն,
մանաւանդ որ անոնք այդ զէնքերը կրնան Ամերիկայի դէմ օգտագործել: «Մայատին» երէկ հաղորդեց,
որ իսրայէլեան քաղաքական աղբիւր մը կը նշէ, որ Ռուսիոյ նախագահ Վլատիմիր Փութին ձեռնարկած
է Եւրոպական Միութեան, սուրիացիներուն եւ իրանցիներուն հետ հաղորդակցութեան արշաւի մը`
ջանալով Սուրիոյ դէմ յարձակումը կանխարգիլել: Իսրայէլեան «Ետիոթ Ահրոնոթ» կայքէջը իր
կարգին նշեց, որ իսրայէլեան նախարարաց սեղմ խորհուրդը երէկ Փութինի քայլերը քննարկած
է: Իսրայէլի վարչապետ Պենիամին Նեթանիահու իր կարգին աշխուժ հաղորդակցութիւններ կը կատարէ
Միացեալ Նահանգները Սուրիոյ դէմ հարուած հասցնելու համոզելու համար: Ամերիկեան զինուորական
աղբիւր մը «Լոս Անճելըս Թայմզ» օրաթերթին յայտնեց, որ ըստ նախնական ծրագիրին, Սուրիոյ
դէմ ամերիկեան գործողութիւնները պիտի տեւեն 3 օր: Միացեալ Նահանգներ կը ծրագրեն հարուածներ
հասցնել Սուրիոյ մէջ գտնուող նշանակէտներուն եւ կրկնել այդ հարուածները, եթէ առաջին հարուածներու
ընթացքին նշեալ 50 թիրախները ոչնչացնել անկարելի ըլլայ: