Францішак: мы павінны станавіцца людзьмі прымірэння і супакою
“Ніколі больш вайны!”
– заклікаў Францішак веруючых і няверуючых людзей, якія прыйшлі вечарам 7 верасня
на плошчу св. Пятра, каб прыняць удзел у Дні посту і малітвы ў інтэнцыі міра ў Сірыі,
на Блізкім Усходзе і ўсім свеце. “Вайна – сказаў Папа – ніколі не была шляхам, які
вёў да міру”. Свет, якога мы жадаем, гэта свет згоды і міру, так як Бог яго стварыў,
- нагадаў Святы Айцец і дадаў, што на жаль, сёння ў ім надалей існуе насілле, падзелы,
супрацьстаянні і войны, а гэта таму, што чалавек замыкаецца ў сваім эгаізме.
“Калі
чалавек думае толькі пра сябе, свае інтарэчы і ставіць сябе ў цэнтры, калі захапляецца
ідаламі і ўладай, калі ставіць сябе на месцы Бога – тады разбурае ўсе адносіны, нішчыць
усё і адкрывае дзверы для гвалту, падзелаў і канфліктаў”, - сказаў Пантыфік. Папа
адзначыў, што калі чалавек “разбурае гармонію з Стварыцелем, падымае руку супраць
брата, каб забіць яго, тады брат, якога мы павінны ахоўваць і любіць” становіцца ворагам,
з якім трэба змагацца”. Паводле Святога Айца таксама і сёння мы працягваем гэты шлях
вайны і наша стаўленне да яе не змянілася. “Колькі ж насілля нараджаецца з-за гэтага,
колькі ж канфліктаў і войнаў пазначылі нашу гісторыю. Дастаткова паглядзець на пакуты
столькі ж нашых братоў і сясцёр”, - сказаў Пантыфік.
“Мы ўдасканалілі нашу
зброю, нашы сумленні заснулі, свае правы мы зрабілі тонкімі, каб апраўдываць сябе.
Быццам бы стала нармальнай рэччу тое, што мы надалей працягваем сеяць знішчэнні, боль
і смерць. Насілле і вайна прыносяць толькі смерць, гавораць пра смерць. Насілле і
вайна маюць мову смерці”, - сказаў Папа.
Святы Айцец выказаў перакананне, што
існуе альтэрнатыва для гэтай спіралі болю і смерці, і што магчыма пайсці іншым шляхам,
шляхам міру. Ён заклікаў, каб кожны з нас, таксама і кіраўнікі дзяржаў пайшлі гэтым
шляхам і ўсе глянулі на Крыж Хрыста, бо ў цішыні Крыжа маўчыць гук зброі і прамаўляе
мова прымірэння, прабачэння, дыялогу і міру.
“Я хацеў бы сёння вечарам прасіць
Бога, каб мы хрысціяне, браты іншых рэлігій, людзі добрай волі моцна закрычалі: насілле
і вайна ніколі не з’яўляюцца шляхам да міру. Няхай кожны гляне ў глыбіню свайго сумлення
і паслухае словы, якія кажуць: выйдзі за межы сваіх інтарэсаў, якія выклікаюць толькі
закрыццё твайго сэрца, пераадолей абыякавасць да іншага чалавека (...) адкрыйся на
дыялог, на прымірэнне: глянь на болі брата твайго, і больш не прычыняй болю яму (...)
няхай спыніцца гук зброі. Вайна ніколі не з’яўлялася шляхам да міру, заўсёды была
паразай чалавецтва”, - сказаў Папа.
Святы Айцец свае разважанні завяршыў
наступнымі словамі: “Прабачэнне, дыялог і прымірэнне з’яўляюцца словамі міру: у любімым
сірыйскім народзе, на Блізкім Усходзе і ўсім свеце. Памолімся за прымірэнне і мір.
Будзем працаваць на карысць прымірэння і міру і будзьма людзьмі прымірэння і міру
ў кожным асяроддзі”.
Пасля прамовы Папы адбылося выстаўленне Найсвяцейшага
Сакрамэнта. Падчас адарацыі пяць пар з Сірыі, Егіпта, Святой Зямлі, ЗША і Расіі прыняслі
на алтар ладан. У рамках адарацыі адбылася малітва нешпараў, а на яе заканчэнне малітва
ў цішыні, якая завяршылася благаславеннем Святога Айца.