Францішак: хрысціянін павінен быць радасным, нібыта ідзе на вяселле
Хрысціянін павінен
быць такім радасным, нібыта ідзе на вяселле, сцвердзіў папа Францішак падчас Эўхарыстыі
ў Доме св. Марты 6 верасня. У сваёй гаміліі Пантыфік падкрэсліў, што жаданне пакласці
навіну Евангелля ў старыя мяхі – гэта спакуса з якой трэба змагацца, а таксама нагадаў,
што сакрамэнт сужэнства – гэта вобраз саюза паміж Хрыстом і Касцёлам. Разважаючы над
тэкстам Евангелля, які прагучаў падчас літургіі, Папа адзначыў, што на старонках Святога
Пісання Езус часта прадстаўлецца ў вобразе жаніха. “Я думаю, што менавіта ў гэтым
самая глыбокая прычына таго, чаму Касцёл так ахоўвае сакрамэнт сужэнства і называе
яго “Вялікім сакрамэнтам” – таму што менавіта ён з’яўляецца вобразам адзінства паміж
Хрыстом і Касцёлам”, - сказаў Францішак. Ён адзначыў, што хрысціяне павінны жыць гэтым
адзінствам, вяселлем, на якім трэба быць радасным.
“Канешне, – дадаў Папа
– бываюць па-сапраўднаму крыжовыя моманты, моманты болю, але заўсёды ёсць глыбокі,
радасны супакой, таму што хрысціянскае жыццё пражываецца як свята, як вяселле Езуса
з Касцёлам”. Пантыфік нагадаў пра прыклад некаторых першых мучанікаў, якія ішлі на
смерць як на вяселле і нават у самы страшны момант мелі “радаснае сэрца”.
Паводле
Святога Айца, Евангелле кажа, што на вяселле пакліканы ўсе: і добрыя і благія. Але,
як ў прыпавесці пра вяселле сына караля, апошні глядзіць – хто з гасцей не апрануў
вясельнага адзення. На думку Пантыфіка, гэта азначае, што неабходна паставіць жаніха,
якім з’яўляецца Езус, у цэнтр уласнага жыцця. “Пан кажа нам, што нельга мець двух
гаспадароў: служыць Богу ці свету”, - адзначыў Францішак.
Папа падкрэсліў,
што хрысціянін заўсёды сустракаецца са спакусай пакласці навіну Евангелля “у старыя
мяхі”. Паводле Францішка – гэта грэх. “У старых мяхах не магчыма насіць новае віно.
У гэтым навізна Евангелля”, - сказаў ён і адзначыў, што Езус патрабуе ад нас поўнай
адданасці. “А калі маем нешта, што не ад Яго – трэба пакаяцца, папрасіць прабачэння
і ісці наперад”, - заклікаў Святы Айцец.