Ռայի պատրիարքը Տիմանի մէջ ընդունեց հրաժարեալ վարչապետ Նեժիպ Միքաթին, որուն հետ քննարկեց
լիբանանեան իրադարձութիւնները: Միքաթիի հետ հանդիպումին ներկայ գտնուեցան նաեւ մարոնի
համայնքի նախկին պատրիարք` կարտինալ Նասրալլա Սֆէյր եւ Լիբանանի մէջ պապական նուիրակ
Կապրիել Քաչիա, ինչպէս նաեւ նախարարի պաշտօնակատարներ Հասսան Տիապ, Ուալիտ Տաուք եւ Ահմետ
Քարամէ: Հանդիպումին ընթացքին Ռայի պատրիարքը շեշտեց, որ իրենք կը գիտակցին Միքաթիի
ստանձնած ծանր բեռին եւ կ՛ողջունեն անոր համբերութիւնը, ինչպէս նաեւ կը բաժնեն անոր մտահոգութիւնը`
Լիբանանի ճակատագիրին վերաբերեալ, նկատի ունենալով շրջանային պայմաններն ու կառավարութիւն
մը կազմելու անկարողութիւնը: Ռայի պատրիարքը կոչ ուղղեց անսալու Ֆրանչիսկոս պապին
կոչին եւ շաբաթ, 7 սեպտեմբեր 2013-ին աղօթելու ու ծոմապահութիւն կատարելու` Սուրիոյ եւ
Միջին Արեւելքի խաղաղութեան համար: Իր կարգին, Քաչիա յայտնեց, որ անհրաժեշտ է ամէն
ջանք ի գործ դնել` Սուրիոյ տագնապին խաղաղ լուծում մը գտնելու առումով: Իր կարգին,
Միքաթի յայտնեց, որ շրջանը դժուար պայմաններ կը դիմագրաւէ, եւ այդ պայմաններուն դիմադրելու
համար պէտք է ամրապնդել լիբանանեան ներքին ճակատը եւ կառչած մնալ չէզոք քաղաքականութեան,
որ աւելի ուշ ստացաւ «Պաապտայի յայտարարութիւն» անունը։