«Սուրիա Ոչ Միայն Իսրայէլը Պիտի Հարուածէ, Այլ Նաեւ Թուրքիան Եւ Յորդանանը, Եթէ Իր Դէմ
Յարձակումին Մասնակցին» Ըսաւ Մըքտատ
Մինչ ՄԱԿ-ի ընդհանուր քարտուղար Պան Քի Մուն յայտարարեց, որ Սուրիոյ շուրջ «Ժընեւ-2»
միջազգային խորհրդաժողովը կրնայ հոկտեմբերին տեղի ունենալ, Սուրիոյ արտաքին գործոց փոխնախարար
Ֆայսալ Մըքտատ կոչ ուղղեց Միացեալ Նահանգներու հետ երկխօսութեան` միեւնոյն ժամանակ սպառնալով,
որ իր երկիրը պիտի հակադարձէ ամերիկեան հարուածին ոչ միայն Իսրայէլը հարուածելով, այլ
նաեւ Յորդանանն ու Թուրքիան, եթէ անոնք ամերիկեան ղեկավարութեամբ յարձակումին մասնակցին: Ան
ամերիկեան «Ուոլ Սթրիթ Ճըռնըլ» օրաթերթին հետ ունեցած հարցազրոյցի մը ընթացքին յոյս յայտնեց,
որ ամերիկացի քոնկրեսականները իմաստուն գտնուին եւ արդարութեան ձայնին ականջ տան եւ ոչ
թէ գրգռիչ արարքներուն` նշելով, որ «եթէ պատերազմը ծագի, ապա կարելի չէ զարգացումներուն
վերահսկել»: ՄԱԿ-ի մօտ Սուրիոյ մնայուն ներկայացուցիչ Պաշշար Ժաաֆարի հերքեց Ղութա
Շարքիյայի մէջ քիմիական զէնքի օգտագործման համար Դամասկոսի ուղղուած ամբաստանութիւնները`
նշելով, որ «բոլորը գիտեն, թէ Հալէպի Խան Ասալ շրջանին մէջ նախկին յարձակումի մը ընթացքին
ով օգտագործեց քիմիական զէնքը»: Ան «Սի.Էն.Էն.»-ի հետ հարցազրոյցի մը ընթացքին Սուրիոյ
ուղղուած ամբաստանութիւնները սխալ որակեց` աւելցնելով, որ ամերիկեան վարչակազմը նախապէս
Վիեթնամի, Քուպայի կամ Իրաքի մէջ իր գործած նոյն սխալները կը կրկնէ: