Францішак: дзе Езус, там заўсёды сціпласць, пакора, любоў і крыж
“Там дзе Езус – заўсёды
ёсць сціпласць, пакора і любоў”, - адзначыў папа Францішак падчас ранішняй Эўхарыстыі
ў Доме св. Марты 3 верасня. У сваёй гаміліі Пантыфік засяродзіўся на розніцы паміж
“спакойным святлом” Езуса, якое прамаўляе ў нашым сэрцы і святлом свету, якое з’яўляецца
“штучным” і робіць нас пыхлівымі і ганарлівымі. Паводле Папы – “ідэнтычнасць хрысціяніна
– гэта ідэнтычнасць святла, а не цемры”. Пантыфік нагадаў словы апостала Паўла скіраваныя
да першых вучняў Хрыста: “Вы браты, не ў цемры (...) бо усе вы дзеці святла”. Францішак
звярнуў увагу на тое, сёння многія думаюць аб магчымасці здабыць святло дзякуючы навуцы
і ці іншым чалавечым рэчам. “Можна ведаць усё, можна мець веды аб усім і гэта святло
рэчаў. Але святло Езуса іншае. Гэта не святло няведання, не! Гэта святло мудрасці
і разважлівасці, але адрознае ад святла гэтага свету. Святло, якое нам дае свет –
штучнае, магчыма яно моцнае – больш моцнае за святло Хрыста; моцнае як штучнае полымя,
як успышка ад фотаапарата. Аднак, святло Езуса – гэта святло ціхае, спакойнае, гэта
святло міра, як святло ночы Божага Нараджэння: непатрабавальнае”, - адзначыў Папа.
Паводле
Святога Айца, святло Езуса нясе спакой. Яно “не робіць шоў”, але “прыходзіць у сэрца”.
Пантыфік папярэдзіў, што часта і сатана выкарыстоўвае метады Езуса – робіць выгляд,
што чыніць дабро, прамаўляе да нас спакойна, як звяртаўся да Езуса ў пустыні. Менавіта,
каб адрозніваць святло Езуса ад сатаны, перапранутага ў светлага анёла, мы павінны
прасіць аб дары мудрасці.
“Колькі людзей думаюць, што жывуць у святле, але
знаходзяцца ў цемры і не разумеюць гэтага. Якое яно – святло, што дае Езус? Святло
Езуса мы можам распазнаць, таму што яна пакорнае, гэта не святло, якое навязваецца:
яно пакорнае. Гэта святло ціхае, з сілай цішыні. Гэта святло, якое прамаўляе ў сэрцы
і якое табе дае крыж. Калі мы, у нашым унутраным святле, з’яўляемся ціхімі людзьмі,
тады пачуем голас Езуса ў сэрцы і будзем без страху глядзець на крыж: гэта і ёсць
святло Езуса”, - падкрэсліў Пантыфік.
Францішак адзначыў, што калі прыходзіць
святло, якое “робіць пыхлівымі”, “якое вядзе да сузірання іншых з вышыні” – яно не
ад Езуса: гэта святло сатаны, “пераапранутага ў Езуса, анёла святла”. Паводле Папы,
“заўсёды там дзе ёсць Езус – ёсць пакора, сціпласць, любоў і крыж”. Святы Айцец заклікаў
у малітве прасіць у Бога аб ласцы неабходнай, каб адрозніваць святло Хрыста ад святла
штучнага – святла, якое паходзіць ад сатаны.