Папа атрымае ў дар кнігу з малюнкамі і лістамі ад дзяцей Еўропы
Папа Францішак атрымае
кнігу з малюнкамі і лістамі ад дзяцей з “перыферый” розных еўрапейскіх краін. Напрыканцы
агульнай аўдыенцыі 4 верасня спецыяльны падарунак Святому Айцу перададуць члены дэлегацыі
Рады біскупскіх канферэнцый Еўропы (CCEE), якія прыбудуць у Рым. У складзе дэлегацыі
будзе чатыры чалавека: харвацкі арцыбіскуп Дакава-Осіек Дуро Граніч, які адначасова
з’яўляецца старшынёй камісіі “Катэхізацыя, школа, універсітэт” Рады еўрапейскіх епіскапатаў,
кс. Мішэль Рэмеры, Генеральны віцэ-сакратар гэтай арганізацыі і аддзінаццацігадовы
малдаўскі хлопец Васіль, які выступіць у якасці “пасла дзяцей” і прыбудзе ў суправаджэнні
біскупа Кішынёўскага Антона Косы.
Паводле ініцыятараў стварэння кнігі з дзіцячымі
малюнкамі і лістамі Пантыфіку, ідэя гэтага праекта ўзнікла адразу пасля абрання апошняга
на Пасад св. Пятра з мэтай расказаць Святому Айцу пра “радасці і надзеі, сум і трывогі
сучасных людзей” Старога Кантынента. У кнізе сабраны малюнкі і лісты ад дзяцей з 42
краін Еўропы. Самаму малодшаму “аўтару” – 5 гадоў, а старэйшаму – 11. “Гэта анталогія
перыферый прысутных у Еўропе. Кароткая прэзентацыя, якая суправаджаецца малюнкам ці
тэкстам падрыхтаваным дзецьмі, паказвае, што многія з іх жывуць на перыферыях гарадоў
і нагадвае нам пра заклік папы Францішка ісці на перыферыі існавання чалавецтва, каб
абвяшчаць радасць і надзею Евангелля”, - гаворыцца на сайце Рады біскупскіх канферэнцый
Еўропы.