Imzot Tozo: sulmi në Siri do të shkaktonte luftë me përmasa botërore
Gjithnjë e më shumë njerëz, shoqata, organizata, institucione e urdhëra fetare vazhdojnë
të deklarojnë se do të marrin pjesë në Ditën e lutjes e të agjërimit, shpallur nga
Papa Françesku më 7 shtator, për t’i kërkuar Hyjit të Gjithpushtetshëm paqen në Siri
e në botë. Duke u nisur nga thirrja e Atit të Shenjtë në Engjëllin e Tënzot të së
dielës, ftuam për një reflektim në mikrofonin tonë sekretarin e Këshillit Papnor “Drejtësi
e Paqe”, imzot Mario Tozo. Ta dëgjojmë: Papa interpreton thirrjen, që ngrihet
nga çdo anë, nga zemrat e secilit, nga familja e madhe, që është njerëzimi. Është
një gufim universal i ndërgjegjes së njerëzve, të popujve. Shoqëritë civile dhe organizatat
e tyre kërkojnë t’i jepet fund luftës e nga ana tjetër, të punohet për paqen, me bindje
e intensivisht. Papa Françesku vazhdon misionin e Jezu Krishtit, Princit të paqes,
që ecën me njerëzimin dhe si një farë e mirë e hedhur në ndërgjegje, e shtyn drejt
plotësimit të fatit të tij përfundimtar. “Lufta thërret luftën”, tha Papa.
Shumë zëra në Kishë ngrihen për të shprehur frikën se një sulm i mundshëm kundër Sirisë
do të përhapte dhunën në të gjithë rajonin. Si mendoni ju? Në Engjëllin e Tënzot
të 1 shtatorit dënohet me vendosmëri një luftë, në të cilën përdoren armë pa dallim,
duke goditur kryesisht popullsinë civile e të pambrojtur. Përdorimi i dhunës nuk sjell
kurrë paqen. Lufta thërret luftën edhe sepse i zë popujt në kurthin e një spiraleje
vdekjeprurëse: mbart në vetvete një këndvështrim të shtrembëruar të pushtetit, i cili
kuptohet si abuzim e mbizotërim e, përveç kësaj, e thekson paragjykimin se njeriu
për njeriun është ujk. Me premisa të tilla, “tjetri” mbetet gjithmonë kundërshtar,
armik për t’u mundur, nuk do të bëhet kurrë vëlla. Lufta nuk mbaron kurrë e arsyet
e drejtësisë shpërfillen. I Lumi Gjon Pali II e pati quajtur luftën në Irak
“aventurë pa kthim mbrapa”. Këtu ka rrezik të bëhet një gabim tjetër i pafalshëm,
apo jo? Siç la të kuptohet Papa Françesku, duhet të jemi në ankth për zhvillimet
dramatike që po përvijohen, sipas lëvizjeve të të mëdhenjve të tokës. Udha e zgjidhjes
së problemeve të Sirisë nuk mund të jetë ajo e ndërhyrjes së armatosur. Dhuna nuk
do të pakësohej. Madje, ekziston rreziku të përhapet e të shtrihet në vende të tjera.
Konflikti në Siri përmban të gjitha elementet për të shpërthyer në një luftë me përmasa
botërore e gjithsesi, askush s’mund të dalë i paprekur nga një përvojë e tillë dhune.
Alternativa nuk mund të jetë tjetër, veçse arsyetimi, iniciativa të bazuara mbi dialogun
e bisedimet. Pra, duhet ndryshuar rrugë. Duhet ndërmarrë pa vonesë udha e takimit
dhe e dialogut, e cila është e mundur vetëm mbi bazën e respektit e të dashurisë së
ndërsjelltë. Pushtetin ideologjik të dhunës, që e asgjëson kundërshtarin, duhet ta
zëvendësojmë me pushtetin e dashurisë, e cila na nxit të kujdesemi për çdo gjë të
përbashkët. Pushteti i vërtetë është dashuria, e cila nënkupton pasionin për të mirën
e të tjerëve, siç thotë vazhdimisht Papa Françesku. Dashuria i fuqizon të tjerët,
nxit nisma bashkëpunimi për drejtësinë e paqen. Papa u bëri thirrje besimtarëve
të të gjitha feve dhe jo besimtarëve të mblidhen në Shën Pjetër, më 7 shtator, Ditën
e lutjes për paqen në Siri e në botë. Kjo nismë të kujton horizontin universal të
enciklikës “Pacem in Terris” të Papës Gjoni XXIII… Të kujton edhe “frymën e
Asizit”, atë që u provua në muajin e tetorit 2011 rreth Papës Benedikti XVI, i cili
vazhdoi ditët e menduara nga Gjon Pali II. Kemi nevojë për “shenja paqeje”, të cilat
i bindin njerëzit më shumë se fjalimet e bukura. Kemi nevojë të jemi shtegtarë të
së vërtetës, shtegtarë të paqes. Arritja e paqes varet nga kërkimi i apasionuar i
së vërtetës mbi njeriun, mbi botën e mbi Zotin. Varet, në veçanti, nga bashkimi me
Të, nga lutja që shndërrohet në vepra drejtësie.