Ռայի Պատրիարքը Այցելեց Եազիժի Պատրիարքին

Մարոնի համայնքի Պշարա Ռայի պատրիարքը երէկ այցելեց Պալամանտ, ուր հանդիպում մը ունեցաւ Եազիժի պատրիարքին հետ:
Հանդիպումէն ետք Ռայի պատրիարքը հաստատեց, որ Սուրիոյ կամ որեւէ այլ երկրի դէմ հուրով եւ սուրով կատարուելիք արտաքին որեւէ միջամտութիւն մերժելի է:
Ռայի պատրիարքը կոչ ուղղեց տագնապին մաս կազմող կողմերուն խաղաղ միջոցներով լուծելու զայն:
Ռայի պատրիարքը պահանջեց նաեւ Հալէպի մէջ առեւանգուած եպիսկոպոսները ազատ արձակել` ընդգծելով, որ իրենք մնայուն կերպով խաղաղութեան եւ երկխօսութեան բառամթերքի պէտք է դիմեն:
«Մենք` իբրեւ քրիստոնեաներ, մեր պատասխանատուութիւնը պիտի ստանձնենք տեղեակ պահելու համար ամբողջ աշխարհը, թէ ի՛նչ է իսլամ կրօնը եւ հակառակը նաեւ ճիշդ է: Չենք ուզեր տեսնել արտաքին որեւէ տուեալ, որ կը խոչընդոտէ մեր քաղաքակրթութիւնն ու անոր պատգամը: Կը մաղթենք, որ Սուրիոյ եւ ամբողջ Արեւելքին մէջ խաղաղութիւն տիրէ», հաստատեց Ռայի պատրիարք: