Siri: L’Osservatore Romano, të shqyrtohen fjalët e Papës
“Përgjegjësit e kombeve e kanë për detyrë të reflektojnë mbi fjalët e fuqishme që
tha Papa Françesku” i cili dje evokoi “gjyqin e Zotit e edhe gjyqin e historisë të
cilit nuk mund t’i ikim!”. Kështu shkruan sot e përditshmja e Selisë së Shenjtë l’Osservatore
Romano në një editorial të drejtorit të saj, profesor Giovanni Maria Vian, i cili
kujton edhe “dhjetëra mijëra viktimat, sidomos civilë” e “flukset e mëdha e përherë
në rritje të refugjatëve të dëshpëruar”, por edhe tërheq vëmendjen mbi “pasojat e
paparashikueshme” të një ndërhyrje ushtarake të mundshme. “Për këtë arsye – shpjegon
Vian – edhe një herë zëri i ipeshkvit të Romës, që tha se është thellësisht i prekur
në zemër për atë që po ndodhë e sidomos për zhvillimet dramatike që po paraqiten,
lartohet me forcë për të dënuar përdorimin e armëve, e me vendosmëri të veçantë përdorimin
e atyre kimike”. Krejt fjalimin e tij, nënvizon profesor Vian në editorialin e
tij, “Papa ia kushtoi situatës ndërkombëtare, një skenari ku prej shumë kohësh e pa
pushim janë shumëfishuar konfliktet, e edhe këto javë përherë e më tepër janë karakterizuar
nga një rritje e egër dhe e pamëshirshme e tragjedisë siriane”. “Prandaj, në një kontekst
shqetësues e me zhvillime të paparashikueshme, Papa Françesku – përfundon drejtori
i Osservatore Romano-s – përsërit se është e domosdoshme e urgjente të braktiset kultura
e ndeshjes dhe e konfliktit: sepse kultura e takimit dhe e dialogut është ndërtimi
i bashkëjetesës në popuj e ndërmjet popujve; kjo është rruga e vetme për paqe, të
cilën Selia e Shenjtë e tregon e nëpër të cilën diplomacia e saj është duke vepruar
me çdo instrument të mundshëm”.