Dy fjalë për jetëshkrimin e të Lumit Vladimir Gjika
Ishte shqiptar, i lindur në Stamboll të Turqisë, më 25 dhjetor 1873 e martir
në Bukuresht të Rumanisë, më 16 maj 1954. Familja e tij, e mirënjohur në
Shqipëri, me origjinë nga Përmeti, u largua në vitet 1500-1600, për t’u vendosur në
lagjen Fanar të Kostandinopojës. Gjatë sundimit të perandorisë osmane, të ndihmuar
nga pashallarë shqiptarë në oborrin e Sulltanit, anëtarët e kësaj familjeje qeverisën
si princa Moldavinë dhe Vllahinë për vite me radhë. E duhet kujtuar se i dhanë botës
edhe njerëz të shquar të kulturës, si Elena Gjikën (Dora d’Istria). Nga kjo familje
rrjedh edhe imzot Vladimir Gjika, i cili lindi si princ ortodoks, për t’u shuguruar
meshtar katolik në moshën 50-vjeçare. Mori pjesë aktive në jetën shoqërore e politike
të Rumanisë gjatë Luftës I Botërore e punoi shumë për bashkimin e vendit, në Paris,
Romë e Vatikan, si delegat i Këshillit Kombëtar Rumun. Pas vitit 1923, kur u shugurua
meshtar, Vladimir Gjika u dërgua nga Kisha Katolike në Sidnej të Australisë, në Budapest,
në Dublin e Buénos-Ájres, ku mori pjesë në kongrese eukaristike ndërkombëtare. Gjithashtu,
ndërmori misione kishtare në Japoni, Kinë e në Cejlon. Bekonte gjithnjë me një nga
gjembat e kurorës së Jezusit e ndër mrekullitë, që u kryen me ndërmjetësinë e tij,
është shërimi i shumë njerëzve dhe lindja e trashëgimtarit të fronit japonez. U
shua më 17 maj 1954, pas shumë torturash të tmerrshme, në një burg komunist të Rumanisë.
Kur vdiq, në moshën 79 vjeçare, peshonte vetëm 40 kilogram. Para se të mbyllte sytë,
në mungesë të meshtarit, u rrëfye me zë të lartë para të gjithë shokëve të qelisë. Zhak
Mariten pati thënë për të: “Princ në botë e për një thirrje më të lartë, Meshtar
i Krishtit”. Tani martir, në nderimet e elterit! Urojmë t’i hapë rrugën lartimit
në nderimet e elterit, 40 martirëve, që populli shqiptar i dhuroi Kishës Katolike,
kryesisht gjatë diktaturës komuniste, edhe ata, në vijim të procesit të lumnimit.