Папа Францішак: вера – не дэкаратыўная аздоба, але сутнасць жыцця

30 жніўня Святы Айцец прывітаў сваіх чытачоў у Твітары думкаю, якую не стамляецца паўтараць на працягу жніўня. У канцы лета, калі многія вяртаюцца да працы ці звычайных заняткаў, Пантыфік зноў прыпамінае хрысціянам: “Вера – не дэкаратыўны элемент, аздабленне. Мець веру – значыць сапраўды ставіць Хрыста ў цэнтр нашага жыцця”. Амаль 2 тыдні таму, перад “Анёл Панскі” 18 жніўня, тлумачачы літургічнае чытанне ў аспекце Года веры, Францішак заклікаў не забывацца пра тое, што жыць верай – гэта значыць выбраць Бога сваім жыццёвым крытэрыем, вымяраць кожны свой крок – Езусам. А гэта азначае не заставацца нейтральнымі, калі занядбоўваецца любоў.
“Вера не з’яўляецца дэкаратыўнай, арнаментальнай аздобай жыцця”, сказаў тады Папа і патлумачыў: вернік ведае, што яго душэўны мір – Езус Хрыстус. Але вера не дае “спакою могілак”, прыпомніў Папа. Яна прымушае выходзіць у жыццё на барацьбу са злом, выбіраючы дабро, праўду, справядлівасць. “Хрысціянін не гвалтоўны, але моцны!” – запэўніў Папа.
Гэтую ж думку аб напаўненні сутнасным дзеяннем прыналежнасці да Хрыста:несці веру, а не быць пасіўным членам Касцёла, Францішак зноў сцвердзіў у сваім навучанні ў нядзелю 25 жніўня: “Я вас пытаюся: ці вы ёсць хрысціянамі, пазначанымі этыкеткаю, ці хрысціянамі праўды?”. Пантыфік папрасіў кожнага адшукаць адказ на пытанне ўнутры сабе. А гаворачы аб сапраўдных верніках, сам адказаў: “Мы, хрысціяне, ніколі не з’яўляемся хрысціянамі па намінацыі, этыкетцы, але з’яўляемся сапраўднымі паслядоўнікамі Хрыста. Хрысціянамі праўды, па сэрцы. Быць хрысціянамі - значыць жыць і светчыць сваю веру праз малітву, праз міласэрднае дзеянне, праз барацьбу за справядлівасць – у сцвярджэнні дабра!”
Звяртаючыся два дні таму да законнікаў-аўгустыніянаў Францішак зноў запрасіў зірнуць усіх ва ўласнае сэрца і запытацца: тваё сэрца яшчэ жадае чагосьці вялікага, ці яно паснула? Папа прыгадаў, што вернік, які не імкнецца да пошуку праўды і дабра, рызыкуе, што яго сэрца атрафіруецца, што ён стане бясплодны, як нейкі “стары халасцяк” ці халасцячка. “Неабходна займацца культывацыяй духоўнай плённасці”, - сказаў Папа законнікам. “Бог чакае на цябе, шукае цябе – што адкажаш Яму? Ты разумееш гэта, ці спіш спакойна?”- запытаўся Папа ў тых, хто выбраў прывіліяваны шлях Хрыстовага служэння, заклікаючы іх , на ўзор св. Аўгустына, не засынаць на хаду.
Вера не павінна быць арнаментальнай, але сутнаснай, каб быць дарогай да Бога, якую хрысціяне пракладаюць для ўсіх людзей.
А. Мартэцкая