Ngushëllimet e Papës për vdekjen e kardinalit Mazombve, gjithnjë në shërbim të të
varfërve e të ungjillëzimit
Ndërroi jetë, dje pasdite, në Lusaka, kardinali zambian Medardo Jozef Mazombve: ishte
81 vjeç. Papa Françesku shpreh, përmes një telegrami drejtuar kryeipeshkvit të
Lusakës, imzot Telesphore George Mpundu, dhimbjen për këtë humbje. Kujton, më pas,
me mirënjohje, impenjimin e palodhshëm të kardinalit për përhapjen e Ungjillit në
Afrikë si dhe verprimtarinë e tij të palodhur në shërbim të të varfërve. Papa i larton
Atit të mëshirës lutjen, që ta shpërblejë për besnikërinë e tij e ta presë këtë shpirt
fisnik, në paqen e gëzimin e qiellit. Kryeipeshkvi i nderit i Lusakës, kryeqytet
i Zambies, ishte i vetmi kardinal i këtij vendi në Kolegjin Kardinalor. I lindur
më 24 shtator 1931, në Kundamira, dioqeza e Shipatës, bir katekisti, zgjodhi rrugën
e meshtarisë. U shugurua më 4 shtator 1960. Vetëm 39 vjeç, u emërua ipeshkëv i Shipatës,
ku shërbeu për 26 vjet. Nga viti 1979, deri më 1986, ishte kryetar i Shoqatës së Anëtarëve
të Konferencës Ipeshkvnore në Afrikën Lindore, themeluar më 1961. Arritja më e madhe
e veprimtarisë së tij, është hapja e Universitetit Katolik në Nairobi të Kenias. Më
18 gusht 1985 shoqëroi Gjon Palin II në përurimin e shkollës së lartë katolike, për
ta shoqëruar përsëri, si kryetar i Konferencës Ipeshkvnore, gjatë shtegtimit dyditor
papnor në Zambia, prej nga Ati i Shenjtë ngriti me forcë zërin për solidaritet ndërkombëtar
në ndihmë të Afrikës dhe preku tema të mprehta, si ajo e racizmit, e borxhit ndërkombëtar,
e refugjatëve, e varfërisë dhe e paqes. Më 30 nëntor 1996 u emërua kryeipeshkëv i
Lusakës. Benedekti XVI e krijoi kardinal më 20 nëntor 2010. Me vdekjen e tij, Kolegji
Kardinalor numëron 201 kardinaj, nga të cilët, 112 zgjedhës e 89, mbi moshën 80 vjeçare.