Кардынал Амата пра будучага благаслаўлёнага кс. Уладзіміра Гіка
31 жніўня ў Бухарэсце
адбудзецца беатыфікацыя румынскага святара і мучаніка за веру кс. Уладзіміра Гіка.
Літургію, падчас якой ён будзе ўзнесены да хвалы алтара, ўзначаліць прэфект Кангрэгацыі
па справах Кананізацыі кардынал Анджэла Амата. У інтэрв’ю Ватыканскаму радыё пурпурат
расказаў пра постаць будучага благаслаўлёнага. “Уладзімір Гіка выкарыстоўваў свае
шматлікія прыродныя дары і ласкі на карысць патрабуючых. Навярнуўшыся ў 1902 г. і
атрымаўшы святарскае пасвячэнне ў Парыжы, 7 кастрычніка 1923 г., ва ўзросце 50-ці
гадоў, ён пачаў актыўную апостальскую дзейнасць на карысць самых прыніжаных і бедных.
У 1939 г., вырашыў застацца ў Румыніі, каб адказаць на патрэбы польскіх бежанцаў,
пасля ўваходу нацыстаў у Польшчу. Верны сваёй “тэалогіі патрэбы” ён клапаціўся пра
хворых, параненых і палонных”, - адзначыў ватыканскі іерарх.
Кардынал Амата
распавёў, што крыжовы шлях кс. Гіка пачаўся незадоўга пасля заканчэння ІІ Сусветнай
вайны, калі камуністычныя румынскія ўлады пачалі сістэматычныя гвалтоўныя рэпрэсіі
супраць католікаў. У 1952 г. святар патрапіў у румынскі канцэнтрацыйны лагер Жылава.
Тут ён даў моцнае сведчанне чалавечай годнасці, евангельскай веры, духоўна падтрымліваў
зняволеных, а таксама прабачыў сваіх катаў. 16 мая 1954 г., не здолеўшы перанесці
катаванняў, кс. Гіка памёр.
Паводле кардынала Амата, будучы благаслаўлёны мае
тры галоўныя рысы: першая заключалася ў яго адданасці экуменізму – кс. Уладзімір Гіка
марыў аб адзінстве Касцёла і бачыў святасць, як шлях да набліжэння гэтага ідэалу;
другая рыса – гэта ўвага да бедных і патрабуючых; а трэццяя – мучаніцкае сведчанне.
Пурпурат расказаў, што кс. Гіка з з верай, адвагай і малітвай пераносіў доўгія допыты,
жосткія збіцці, а таксама сімуляцыі павешання, якім яго падвяргалі каты.
“Гэта
беатыфікацыя, павінна разглядацца як прароцкі знак прымірэння і міру, як памяць аб
сумным мінулым, якое не павінна паўтарыцца ніякім чынам і як заданне будавання такой
будучыні у якой будзе надзея, братэрская еднасць, свабода і радасць”, - адзначыў ватыканскі
кардынал.