Չաք Հէյկըլ , Ամերիկեան Բանակը Պատրաստ Է Անմիջապէս Գործի Լծուելու, Եթէ Օպամա Սուրիան
Հարուածել Հրամայէ
Միացեալ Նահանգներու պաշտպանութեան նախարար Չաք Հէյկըլ յայտարարեց, որ ամերիկեան բանակը
պատրաստ է անմիջապէս գործի լծուելու, եթէ Օպամա Սուրիան հարուածել հրամայէ: Ռուսական
զինուորական աղբիւր մը «Ինթըրֆաքս» լրատու գործակալութեան յայտնեց, որ Սուրիոյ մէջ արեւմտեան
զինուորական որեւէ միջամտութիւն դիւրին յաղթանակ մը պիտի չըլլայ, որովհետեւ Սուրիա յարձակումները
ետ մղելու բաւարար հակաօդային պաշտպանութեան համակարգեր ունի: «Ռոյթըրզ» լրատու գործակալութիւնը
կը հաղորդէ, որ արեւմտեան ուժերը սուրիական ընդդիմութեան յայտնած են, որ յառաջիկայ քանի
մը օրուան ընթացքին Սուրիոյ հարուած մը ուղղել կը նախատեսեն: «Ռոյթըրզ» լրատու գործակալութիւնը
կը նշէ, որ սուրիական ընդդիմութիւնը արեւմտեան ուժերուն Սուրիոյ մէջ թիրախներու ցանկ
մը փոխանցած է: Աղբիւրներ «Ռոյթըրզ»-ին յայտնեցին, որ արեւմտեան ուժերը ընդդիմադիր ուժերուն
յորդորած են հակառակ մօտալուտ զինուորական հարուածին «Ժընեւ-2»-ին պատրաստուիլ: Փենթակոնէն
պաշտօնատար մը «Ուաշինկթըն Փոսթ» օրաթերթին յայտնեց, որ Սուրիոյ ափերուն մօտ գտնուող
ամերիկեան նաւատորմիղի 4 մարտանաւերը որեւէ հրաման ստանալու պարագային քանի մը ժամէն
Սուրիան հարուածելու կազմ ու պատրաստ են եւ անոնք այդ մէկը կատարելու համար յարմար դիրքեր
գրաւած են: Նշենք, որ Բրիտանիոյ վարչապետ Տէյվիտ Քամերոն բրիտանական խորհրդարանը հրաւիրեց
հինգշաբթի օր արտակարգ նիստի մը` քննարկելու համար Սուրիոյ հարցը: Ամերիկեան աղբիւրներ
«Սի.Էն.Էն.»-ի հետ զրոյցի մը ընթացքին հաւանական նկատեցին, որ Սուրիոյ դէմ զինուորական
հարուածները սկսին հինգշաբթի օր: Իսրայէլեան պատկերասփիւռի 10-րդ կայանը հաղորդեց,
որ Օպամա Սուրիան հարուածելու որոշումը պիտի տայ յառաջիկայ 48 ժամերուն ընթացքին: Ուաշինկթընի
մէջ պատկերասփիւռի կայանի լրագրողը կը հաղորդէ, որ հարուածը «խորհրդանշական» պիտի ըլլայ
եւ գետնի վրայ ուժերու հաւասարակշռութեան վրայ պիտի չազդէ, որովհետեւ վարչակարգը տապալելու
նպատակ գոյութիւն չունի: «Հիմնական գաղափարը այն է, որ յարձակումը պիտի ըլլայ պատգամ
մը եւ ոչ աւելին», նշեց լրագրողը: Յարձակումը պիտի գործուի շրջանային ջուրերուն եւ օդային
տարածքներուն դուրսէն` «Թոմահոք» տիպի հրթիռներով: Ֆրանսական դիւանագիտական աղբիւր
մը «Ռոյթըրզ»-ին յայտնեց, որ իր երկիրը Սուրիոյ մէջ քիմիական զէնքով յարձակումին հակադարձելուն
մէջ իր պարտաւորութիւններէն պիտի չհրաժարի: