Кардынал Уэлле: да візіту ў Рыа Папа не любіў падарожнічаць
Падарожжа ў Рыа-дэ-Жанейра
змяніла папу Францішка. Ён больш пераканаўся ў важнасці сваёй місіі і набраўся досведу
карыснага для наступных Апостальскіх падарожжаў. Такога меркавання прытрымліваецца
адзін з найбліжэйшых супрацоўнікаў Святога Айца, прэфект Кангрэгацыі па справах Біскупаў,
канадскі кардынал Марк Уэлле. У інтэрв’ю французскаму выданню “Хрысціянская сям’я”
пурпурат адзначыў, што Папа не вельмі любіць падарожнічаць і мае характар “дамаседа”.
Будучы арцыбіскупам Буэнас-Айрэса ён неахохвотна пакідаў тэрыторыю сваёй дыяцэзіі,
а самаго сябе цалкам прысвячаў працы “на месцы”. Але, паводле кардынала Уэлле, пасля
візіту ў Рыа-дэ-Жанейра ў Святога Айца з’явілася гарачае жаданне здзейніць новыя падарожжы.
Кардынал Уэлле адзначыў, што яшчэ перад адлётам у Бразілію Папа глядзеў на ідэю удзелу
ў Сусветных днях моладзі з пэўнай асцярогай і бояззю, але затым з энтузіязмам уключыўся
ў іх.
Сярод іншых аргументаў у інтэрв’ю часопісу французскіх хрысціянскіх сем’яў,
пурпурат адзначыў, што будучыняй Касцёла з’яўляюцца сем’і, якія трываюць у веры, перадаюць
жыццё і самі катэхізуюць сваіх дзяцей. “На школу нельга разлічваць”, - прызнаў кардынал
Уэлле і дадаў, што касцёльныя суполкі часта ўзнікаюць менавіта вакол такіх сем’яў.