Լաւրով Արեւմուտքը Կը Զգուշացնէ
Անցեալի Սխալները Կրկնելէ
Ռուսիոյ արտաքին գործոց նախարար Սերկէյ Լաւրով երէկ մամլոյ ասուլիսի մը ընթացքին յայտնեց,
որ «սուրիական ընդդիմութիւնը երկխօսութիւն չ՛ուզեր, եւ այդ յստակ է»` նշելով, որ «Սուրիոյ
մէջ քաղաքական լուծումը խանգարել ուզող մը կայ»:Ան աւելցուց, որ «արեւմտեան շրջանակները կը ջանան Ժընեւի խորհրդաժողովը ձախողութեան մատնել եւ վարչակարգը բռնի ուժով փոխել»:
Լաւրով ըսաւ, որ արեւմուտքը Սուրիոյ մէջ քիմիական զէնքի օգտագործման վերաբերեալ որեւէ փաստ չունի, իսկ քիմիական զէնքի օգտագործման շուրջ բարձրացած աղմուկին նպատակը «Ժընեւ-2»-ը տապալելն է:
Ռուսիոյ դիւանագիտութեան պետը ընդգծեց, որ «եթէ Սուրիոյ մէջ արեւմտեան զինուորական միջամտութիւն մը ըլլայ, Ռուսիա պատերազմին պիտի չմիանայ»:
Լաւրով ըսաւ, որ Սուրիոյ մէջ զինուորական ճակատումի ուղղութեամբ գրգռում կայ եւ զարմանք յայտնեց Սուրիոյ մէջ զինուորական միջամտութեան վերաբերեալ Արեւմուտքի յայտարարութիւններուն նկատմամբ` նշելով, որ ուժի օգտագործումը իսլամական համակարգին մէջ տարակարծութիւնները պիտի բարդացնէ եւ Սուրիոյ մէջ կացութիւնը պիտի վատթարացնէ` աւելցնելով, որ առանց ՄԱԿ-ի Ապահովութեան խորհուրդին կողմէ որոշումի մը, ուժի օգտագործումը ՄԱԿ-ի ուխտի խախտում մը կը նկատուի:
«ՕԹԱՆ-ի միջամտութիւնը շատ վտանգաւոր է, եւ անիկա պէտք է լաւապէս մտածէ այդ սխալը գործելէ առաջ», ըսաւ ան` աւելցնելով, որ «Սուրիոյ ահաբեկման գործողութիւնը Իրաքի եւ Լիպիոյ մէջ տեղի ունեցածին կը նմանի»:
| All the contents on this site are copyrighted ©. |