Lurdë: Filloi shtegtimi i dioqezit të Romës drejt Lurdës, kryesuar nga kardinali
mëkëmbës, Agostino Valini. Shtegtarët do të nisen me anije e tren, për të arritur
në qytetin e mrekullisë së Zojës së Bekuar. Nisma, që do të vijojë deri më 31 gusht,
është bërë tashmë traditë. Filloi që më 1957, kur u organizua për herë të parë me
tren. “Lurda, portë e fesë” është tema e shtegtimit, pesë ditë, me pesë etapa reflektimi:
Shenja e Kryqit, shkëmbi i shpellës, uji i burimit, drita e shtegtarëve dhe jeta e
re. Gjatë shtegtimit do të kremtohet edhe një Udhë Kryqi me qirinj ndezur, procesioni
eukaristik me bekimin e të sëmurëve dhe vizita në viset ku jetoi Bernardetë Subiru,
së cilës Zoja e Bekuar iu duk 18 herë. Shtegtimi do të arrijë kulmin me Meshën ndërkombëtare,
kremtuar në Shpellën e Lurdës, tek këmbët e Zojës.
Në Asizi të Italisë,
filloi Java e 11-të kombëtare e formimit dhe përshpirtërisë misionare, organizuar
nga Konferenca ipeshkvnore italiane, me temë: “Në udhët e botës, me Ungjillin në dorë,
në kërkim të njerëzve”.
Në Siri, pranë manastirit Deir Mar Musa, natën
e festës së Shën Moisiut, që bie më 28 gusht, u kremtua sot një lutje, shoqëruar me
agjërim, për paqen në Siri si dhe për lirimin e atë Dal’ Olios, rrëmbyer rreth një
muaj më parë në zonën e Raka.
Benin: Në Kalavi, vijon Kongresi panafrikan
i Përtëritjes karizmatike katolike, kushtuar temës “Pajtim, drejtësi e paqe, nëpër
pushtetin e Shpirtit Shenjt”. Sot u reflektua rreth temës: “Paqe e bashkëjetesë, në
dashuri.”