Solidaritet i ipeshkvijve zviceranë për të krishterët në Egjipt

Konferenca ipeshkvnore zvicerane (Ces) u shprehu solidaritetin të krishterëve e Egjiptit e të Lindjes së Mesme. Në një notë, nënshkruar nga imzot Markus Byshel, kryetar i Ces, përshkruhet, me indindjatë e trishtim, situata dramatike, në të cilën po jeton sot Egjipti, së bashku me vendet e tjera të Lindjes së Mesme, si Siria. Duke pohuar se bashkësitë e krishtera në Egjipt janë posaçërisht të ligështa, imzot Byhel i ftoi të gjithë katolikët e Zvicrës të luten për viktimat e dhunës, posaçërisht, dje, gjatë meshëve të së dielës. Gjithnjë dje, në Abacinë e Einsielden, u kremtua një Mbrëmësore lutjeje, me frymë të thellë solidariteti. Në kremtim ishin të pranishëm edhe disa koptë, me seli në Zvicër. Bashkuan, kështu, zërat, në lutje për viktimat e çmendurisë njerëzore. Nota e ipeshkvijve pohon edhe se ipeshkvijtë helvetikë e shikojnë me seriozitet të madh e plot shqetësim situatën në Kairo dhe i ftojnë famullitë e bashkësitë fetare në vend t’ia besojnë Zotit të gjithë njerëzit, viktima të dhunës e të padrejtësisë, duke u lutur që të hapen zemrat, për t’i bërë udhë paqes së Zotit, që është vetë paqja. Dhuna e terrori, që vijojnë në këto troje, vijon nota e Ces, vë në shënjestër të gjithë popullsisnë, njerëz të çdo moshe, të çdo feje e të çdo përkatësie politike, pa harruar këtu, plaçkitjen e më se 80 kishave, manastireve, kuvendeve, shkollave të krishtera, spitaleve dhe institucioneve të tjera. Njëkohësisht imzot Byhel thekson se mbetet thellësisht i prekur, në kuptimin më të mirë të fjalës, nga qëndrimi i disa myslimanëve, të cilët po impenjohen krah për krah me të krishterët në mbrojtjen e kishave e të besimtarëve të krishterë. Së fundi Konferenca ipeshkvnore helvetike kërkon nga qeveria vendase të shfrytëzojë të gjitha rrugët diplomatike në favor të përfundmit pozitiv të krizës egjiptiane e të respektit për lirinë fetare. Nota përfundon me njoftimin se Karitasi zviceran do të nisë ndihma të reja konkrete në favor të viktimave të dhunës egjiptiane.