Patriku Bechara Raï: të krishterët paguajnë haraçin më të rëndë nga luftat në Lindjen
e Mesme
Situata në Lindjen e Mesme po bëhet çdo ditë e më kritike. Folëm për këtë me kardinalin
Bechara Raï, Patrik i maronitëve të Antiokisë. Ta dëgjojmë reflektimin e tij:
Përgjigje:
- Shiko, gjithçka ndodh në Lindjen e Mesme, si në Egjipt, ashtu në Siri e në Irak,
është luftë me dy përmasa. Në Irak e në Siri, luftë ndërmjet sunitëve e shiitëve;
në Egjipt, luftë ndërmjet fondamentalistëve, ndër të cilët Vëllezërit Myslimanë, e
të moderuarve. Janë luftëra pa fund mbi të cilat, e them me keqardhje, ndikon fuqimisht
edhe qëndrimi i disa vendeve, posaçërisht perëndimore, që po i nxisin këto konflikte.
Duhet gjetur zgjidhja e gjithë këtyre problemeve. Ne, të krishterët, që prej 1400
vjetësh po jetojmë së bashku me myslimanët dhe kemi përhapur në këto troje vlera njerëzore
e morale, vlera shumëkonfesionale, pluraliste, moderne.... Falë pranisë së të krishterëve
në jetën tonë të përditshme, në të gjitha këto vende arabe, kemi krijuar një farë
moderimi në botën myslimane. Sot shikojmë, të pafuqishëm, si shkatërrohet gjithçka
ndërtuan të krishterët gjatë 1400 vjetëve. E, njëkohësisht, të krishterët paguajnë
haraçin më të rëndë në këto luftëra ndërmjet sunitëve e shiitëve e ndërmjet të moderuarve
e fondamentalistëve përsa i përket Egjiptit.
Pyetje: - Pakica e krishterë
në Egjipt po paguan çmimin më lartë, në situatën e sotme...
Përgjigje: -
Si gjithnjë, kur nis kaosi a lufta, në përgjithësi myslimanët u lëshohen në shpinë
të krishterëve, si të ishin fajtorë për gjithçka ndodh. Më vjen keq, por në Egjipt
janë Vëllezërit Myslimanë, e jo të krishterët, që sulmuan Kishat e koptëve e edhe
vetë koptët.. Për fat të keq, kjo është mendësia e disa myslimanëve: sa herë krijohet
kaos, sulmohen të krishterët, pa e ditur as pse sulmohen. E njëjta gjë ndodhi edhe
në Irak, e po ndodh në Siri e në Egjipt. Ata nuk e dinë pse iu sulen të krishterëve,
por është pikërisht kështu. Të krishterët në botën arabe kërkojnë një gjë të vetme;
siguri e stabilitet: vetëm këtë!
Pyetje: - Vëllezërit myslimanë i përligjin
sulmet e tyre kundër të krishterëve, duke i akuzuar se përkrahën haptazi rrëzimin
e Morsit...
Përgjigje: - Në të gjithë botën arabe, të krishterët janë
përkrah institucioneve, e respektojnë vendin, në të cilin jetojnë, autoritetet, Kushtetutën.
Dihet nga të gjithë se Vëllezërit Myslimanë, brenda një viti, bën një hap të madh
mbrapa, duke u përpjekur të zbatojnë Sharinë, ndërsa populli egjiptian kërkonte reforma
në fushën politike. Të gjitha manifestimet popullore kishin si qëllim kërkesën për
reforma politike, që do të thoshte lëvizje në drejtim të demokracisë. E si zakonisht
Perëndimi, nuk jam i autorizuar të përmend emra kombesh të veçanta, u dha një kontribut
në formën e miliarda dollarëve Vëllezërve Myslimanë, që të merrnin në dorë pushtetin.
Sa e morën këtë pushtet, nisën menjëherë të zbatojnë Sharinë, ligjin islamik, domethënë
u bë një hap mbrapa. Natyrisht të krishterët janë kundra kësaj: të krishterët duan
një Egjipt të reformuar, demokratik, një Egjipt, që di të respektojë të drejtat e
njeriut. Janë gjithnjë besnikë ndaj shtetit e institucioneve.
Pyetje: -
Ç’parashikoni për ardhmërinë e Lindjes së Mesme?
Përgjigje: - Sipas
leximit tonë të përditshëm të fakteve, që po jetojmë, ka një projekt të mirëpërcaktuar,
që synon shkatërrimin e botës arabe, për interesa ekonomike e politike të caktuara.
Ka edhe plane për t’i bërë gjithnjë më të mprehta konfliktet ndër-konfesionale në
botën myslimane, ndërmjet sunitëve e shitëve. Një projekt, pra, që synon ta shkatërrojë
Lindjen e Mesme. Për fat të keq, kjo soj politike vjen nga jashtë. I kam shkruar dy
herë Atit të Shenjtë, për t’ia shpjeguar këtë, që po ndodh e ia kam treguar gjithë
të vërtetën objektive, ashtu si është. Më vjen keq, por duhet ta them se kush paguan
më shtrenjtë në këtë plan shkatrrimtar, janë të krishterët. Në Irak, nga një milion
e gjysëm të krishterë, kemi humbur një milion, nësa bashkësia ndërkombëtare bën sehir,
në heshtje.