Kardinali Skola në qytetin e Kostandinit për 1700 vjetorin e Ediktit të Milanos
Kryeipeshkvi i Milanos, kardinali Anxhelo Skola, do të jetë më 20 e 21 shtator në
Nish të Serbisë, për të marrë pjesë në kremtimet e 1700-vjetorit të Ediktit të Milanos,
dokument i rëndësishëm për tolerancën fetare nënshkruar në vitin 313 nga perandori
romak Kostandini, me prejardhje pikërisht nga Nishi. Kardinali do të mbërrijë në qytetin
serb më 19 shtator, të nesërmen do të takohet me Patrikun ortodoks serb, Irinej dhe
me presidentin e vendit, Tomisllav Nikoliç. Papa Françesku, duke caktuar kardinalin
Skola si të dërguarin e tij në kremtime, i ka dhënë me vete edhe një letër, me anë
të së cilës shpreh vlerësimin e tij për Serbinë dhe për të gjithë ata, që marrin pjesë
në përkujtimin e 1700-vjetorit të Ediktit të Milanos, në Nish. Papa, siç deklaroi
në një konferencë shtypi kryeipeshkvi i Beogradit, imzot Stanislav Hoçevar, dëshiron
të bëjë çdo përpjekje të mundshme për të favorizuar bashkimin ndërmjet kishave të
lindjes e atyre të perëndimit.