Нягледзячы на тое,
што Бэнэдыкт ХVI не прыме непасрэднага ўдзелу ў сёлетняй сустрэчы “Кола вучняў Ратцынгера”,
ён сустрэнецца з яго ўдзельнікамі. 1 верасня Папа на пенсіі ўзначаліць Эўхарыстыю
для сваіх былых студэнтаў, якія збяруцца 29 жніўня – 2 верасня ў Кастэль-Гандольфа.
Пра гэта расказаў кіраўнік “Кола” кс. Штэфан Горн у інтэрв’ю аўстрыйскаму каталіцкаму
агенцтву “Kathpress”. Ён адзначыў таксама, што ў сёлетняй сустрэчы прымуць удзел арцыбіскуп
Венскі кардынал Крыстаф Шонборн і старшыня Папскай рады спрыяння хрысціянскаму адзінству
кардынал Курт Кох.
Бэнэдыкт ХVI асабіста прыняў рашэнне, што тэмай сёлетняй
сустрэчы будзе “пытанне Бога на фоне секулярызацыі” ў святле філасофскай і тэалагічнай
творчасці Рэмі Брага, франнузскага тэарэтыка, узнагароджанага ў мінулым годзе “Прэміяй
Ратцынгера”.
Члены “Кола вучняў Ратцынгера” сустракаюцца рэгулярна з 1978
г. У яго ўваходзяць асобы, якія пад кіраўніцтвам Папы на пенсіі пісалі доктарскія
дысертацыі або былі яго памочнікамі. Перш, чым кардынал Ёзэф Ратынгер стаў прэфектам
Кангрэгацыі Веравучэння, тэолагі сустракаліся раз у месяц. Затым, калі быў абраны
на Пасад св. Пятра семінары праводзяцца раз у год. Падчас сустрэч навукоўцы абмяркоўваюць
розныя пытанні. Апошняя з іх была прысвечана ІІ Ватыканскаму Сабору і новай евангелізацыі.