Գահիրէի Եւ Աղեքսանդրիոյ Հայ Համայնքներու Իրավիճակը
Գահիրէի հայ գաղութի կացութիւնը հանդարտ է, թէեւ միութենական գործունէութիւն չկայ, որովհետեւ
քաղաքին մէջ արտակարգ դրութիւն հաստատուած է: Այս մասին Գահիրէէն «Ազդակ»-ին յայտնած
է Սուրէն Պայրամեան։ Ան նշած է, որ Գահիրէի Ռամսես հրապարակին վրայ Իսլամ եղբայրներուն
կատարած քայլարշաւին ընթացքին ցուցարարները հայ առաքելական եկեղեցւոյ մօտէն անցած են
եւ քարեր նետելով` փշրած եկեղեցւոյ նկարազարդուած ապակիները: Ցուցարարները նաեւ քոքթել
մոլոթով մը նետած են, սակայն եկեղեցւոյ պահակները անմիջապէս մարած են կրակը: Աղբիւրին
համաձայն Գահիրէի մէջ ընդհանրապէս եկեղեցիներու դէմ մեծ յարձակումներ չկան, որովհետեւ
ապահովական ուժերը խիստ միջոցառումներ որդեգրած են` աւելցնելով, որ եկեղեցիներու դէմ
յարձակումները ընդհանրապէս երկրին ծայրամասերուն մէջ կը կատարուին: