Protestë e të krishterëve të Pakistanit për shpalljen e pafajësisë së imamit, që pati
akuzuar Rimshën
Nuk u besoi syve bashkësia e krishterë e Pakistanit, kur pa vendimin e gjykatës së
Islamabadit, e cila e shpalli të pafajshëm imamin Khalid Çishti, që pati ngritur akuza
të rreme për blasfemi kundër vajzës katolike me të meta mendore, Rimsha Masih. Një
vit pas ngjarjeve, gjykatësi u detyrua ta shpallë të pafajshëm për mungesë provash.
Gjashtë dëshmitarë tërhoqën deklaratat, që e akuzonin imamin si protagonistin e komplotit.
Natyrisht, kjo ndodhi pasi myslimanë integralistë sulmuan lagjen e krishterë, ku jetonte
familja e Rimshës, duke i detyruar shumë familje të largoheshin për të shpëtuar nga
raprezalja. Avokati i krishterë, Sardar Mushtak, në një letër për qeverinë e Pakistanit,
denoncon faktin, duke arsyetuar se ai do të çojë në abuzime të tjera të ligjit për
blasfeminë dhe, kërkon shfuqizimin e këtij ligji e të gjitha ligjeve të tjera diskriminuese.
Aktualisht, Rimsha dhe familja e saj janë strehuar në Kanada, e cila u ka dhënë të
drejtën e azilit politik.