Генеральны настаяцель
ордэна бэнэдыктынцаў, айцец Ноткер Вольф падзяліўся сваімі думкамі адносна сітуацыі
ў Паўночнай Карэі. Законнік вярнуўся з гэтай закрытай для свету краіны, некалькі дзён
таму. Там ён наведаў будаўніцтва каталіцкай бальніцы, якім займаюцца айцы бэнэдыктынцы.
Гаворачы пра пастаянную напружанасць у адносінах паміж Захадам і Паўночнай Карэяй,
святар адзначыў, што апошняя “хоча быць паважанай”. “Гэта праблема ўсіх перамоваў:
на Захадзе думаюць, што Паўночная Карэя маленькая і незначная камуністычная дзяржава,
але так не можа працягвацца. Таксама і яны хочуць быць паважанымі і адчуваць сябе
нараўне з іншымі, не хочуць прыніжацца перад абліччам высакамернасці іншых людзей
ці краін. Трэба паважаць іх чуллівасць”, - сказаў а. Вольф.
Ён падзяліўся,
што на ўласным вопыце ведае пра эфектыўнасць паважлівых адносін з паўночна-карэйскімі
ўладамі. Святар адзначыў, што паважаючы іх можна дасягнуць згоды ў многіх пытаннях.
Айцец Фольф расказаў, што такім шляхам ордэн бэнэдыктынцаў атрымаў дазвол на будаўніцтва
бальніцы ў Паўночнай Карэі. “Яны бачылі, што мы іх паважаем, не накладаем эмбарга,
не пагражаем сілай. Мы хрысціяне ведаем: сіла супярэчыць пасланню Езуса, а мы тут
каб служыць”, - сказаў ён.
Айцец Ноткер Вольф расказаў, што будучая бэнэдыктынская
бальніца ў Паўночнай Карэі будзе разлічана на 100 месцаў. У ёй будуць розныя аддзяленні,
у тым ліку гінекалагічнае. Святар падзяліўся, што атрымліваць навіны з Паўночнай Карэі
складана, таму, каб праверыць стан рэчаў на будаўніцтве, ён вымушаны быў паехаць туды
асабіста.