Masakër në Egjipt: mëse 500 të vdekur, sulmohen mëse 20 kisha. Ipeshkvi i Asiutit:
nuk duam shtet islamik
Masakra e paralajmëruar në Egjipt ndodhi. Policia shpërndau dje me forcë manifestimet
pro ish-presidentit Morsi, gjë, që shkaktoi ndeshje të përgjakshme në të gjithë vendin.
Sipas autoriteteve, viktimat janë së paku 500 vetë e mijëra, të plagosurit, por partia
e Vëllezërve Myslimanë deklaron se të vdekurit kanë arritur shifrën e frikshme prej
4.500 vetësh. Islamistët sulmuan mëse 20 kisha të krishtera. Në përpjekjen për të
rimarrë në dorë situatën, qeveria ka shpallur gjendjen e emergjencës dhe ka vendosur
shtetrrethimin nga ora 19.00 gjatë gjithë natës e deri në orën 6.00 të mëngjesit.
Bashkësia ndërkombëtare s’bën tjetër, veçse vazhdon të dënojë publikisht ngjarjet,
ndërsa integralistët e “Jamaa Islamiya” (Xhama Islamija), politikisht pranë ideve
të Morsit, deklarojnë se nëse nuk ndalet dhuna, do të fillojë revolucioni në të gjithë
vendin. Ndër të vdekurit, edhe katër gazetarë, një e re egjiptiane, gazetare e Emirateve
të Bashkuara Arabe dhe një kameraman i televizionit Skynews së bashku me dy kroniste.
Në Aleksandri, fatkeqësisht, është sulmuar me armë biblioteka e famshme, e njohur
që nga lashtësia. Nga ana tjetër, edhe kundërshtarët e Morsit protestojnë për
mënyrën e zhvillimit të ngjarjeve. Mohamed El Baradei dha dorëheqjen nga posti i zv.presidentit
të përkohshëm, duke i shkruar presidentit aktual Mansur: “Ekzistonin opcione paqësore
për zgjidhjen e krizës”. Irani e Katari mbrojnë manifestuesit e kërkojnë t’i jepet
fund dhunës menjëherë, ndërsa kryeministri turk Erdoan u bën thirrje OKB-së dhe Lidhjes
Arabe. SHBA-të janë kundër gjendjes së emergjencës dhe kërkojnë respektimin e të drejtave
të njeriut. Ftuam në mikrofonin tonë ipeshkvin katolik të Asiutit, Uiliam Kirillos: E
prisnim reagimin e islamistëve kundër ndërhyrjes së policisë; po i largojnë nga vendet
e manifestimeve. Reagimi i parë ishte t’u thoshin botës perëndimore e amerikane: “Vendi
nuk mund të shkojë përpara pa ne!”. Pastaj, reagimi i dytë ishte kërkesa për ndërhyrjen
e botës perëndimore. Por ne jemi të sigurtë se ky është fundi i islamistëve, sepse
Egjipti nuk e pranon një shtet fetar, siç e donin islamistët. Egjipti nuk e do shtetin
islamik, dëshiron ta ndajë fenë nga shteti. Janë sulmuar edhe shumë kisha,
në çdo anë të vendit… Po ndjekim me vëmendje ç’po ndodh, sidomos në Minia e
Sohag, ku i kanë vënë flakën katedrales ortodokse. Në Asiut, falë Zotit e pranisë
së ndjeshme të ushtrisë e të policisë, nuk kemi pasur sulme kundër kishave: kanë hedhur
ndonjë gur vetëm te katedralja ortodokse. Sipas jush, cila do të jetë e ardhmja
e Egjiptit, duke pasur parasysh çastet, që po kalon vendi? Tani, presidenti
i përkohshëm, qeveria e re dhe komiteti po përgatisin Kushtetutën. Pastaj, do të kemi
zgjedhjet parlamentare e së fundi, ato presidenciale. Pas revolucionit të 25 janarit,
shpresonim se hapi i parë do të ishte hartimi i Kushtetutës së re e pastaj, hapi i
dytë, zgjedhjet. Fatkeqësisht, islamistët e kushtëzuan aq shumë juntën ushtarake,
saqë u organizuan zgjedhjet para hartimit të Kushtetutës. Prandaj, u shkrua një Kushtetutë
me natyrë fetare, që nuk përfaqëson egjiptianët. Popullsia u zhgënjye krejtësisht:
presidenti pati bërë shumë premtime, por asnjë prej tyre nuk u realizua. Populli e
kuptoi se presidenti po punonte për interesat e partisë së vet e jo për Egjiptin.
Tani shpresojmë në një të ardhme më të mirë për këtë vend.