Францішак да мексіканцаў: захаваць лепшае з духоўнай спадчыны
“Моцным духоўным стымулам
для абнаўлення місійнай дзейнасці” назваў папа Францішак святкаванне 200-годдзя пабудовы
архікатэдральнага касцёла ў Мехіка. Святы Айцец скіраваў спецыяльнае пасланне з нагоды
ўрачыстасцяў, якія пройдуць у мексіканскай сталіцы 15 жніўня. У ім Пантыфік заклікаў
вернікаў умацоўвацца ў надзеі, якая нараджаецца дзякуючы веры. Паводле Папы, святкаванне
200-годдзя архікатэдры ў Мехіка, гэта нагода, каб паглядзець у мінулае, умацаваць
цяперашняе і падрыхтаваць будучыню. “З гісторыі гэтага касцёла мы можам вынесці ўрок
для нашага хрысціянскага жыцця”, - напісаў Францішак і заклікаў вернікаў “захоўваць
лепшае з гэтай духоўнай спадчыны”. Ён адзначыў, што ўрачыстасці павінны стаць нагодай
для навяртання, “моцным духоўным стымулам да радаснага ўсведамлення, што заданне кожнага
ахрышчанага – быць вучнем і місіянерам Хрыста”.
У дадзеным кантэксце Папа нагадаў
пра каштоўнасць Эўхарыстыі, з якой “мы атрымліваем сілы, каб сведчыць аб любові Езуса
ва ўсіх асяродках, асабліва сярод найбольш няшчасных”. Ён заахвоціў вернікаў “глядзець
у будучыню з надзеяй”. “Не дазвольце скрасці вашу надзею!”, - заклікаў Святы Айцец.
Асаблівую
ўвагу Папа звярнуў на важнасць выхавання ў веры моладзі. Ён пажадаў, каб Божае слова,
якое абвяшчаецца ў архікатэдральным касцёле, больш укаранялася ў сэрцах дзяцей, юнакоў
і дзяўчат, якія з’яўляюцца “брамай радасці і энтузіязма”. “Моладзі мы павінны даць
лепшае з таго, што маем: Хрыста, Збаўцу і Сябра, які ніколі не пакіне”, - сказаў Францішак.
Ён падкрэсліў, што ў першую чаргу, гэта заданне тычыцца бацькоў, якія павінны разлічваць
не толькі на ўласныя сілы, але і на моц малітвы. Святы Айцец даверыў мексіканскі народ
матчынай абароне Маці Божай Гвадэлупскай і папрасіў маліцца за яго.