Aodi: edhe myslimanëve u duhet një prijës, si Papa Françesku
“Edhe në botën arabe, do të duhej një personalitet, si Papa Françesku, prijës, që
di të bashkojë e të risjellë paqe e prehje”. Shprehet kështu, në agjencinë Adnkronos,
Fuad Aodi, kryetar i “Shoqatës së mjekëve të huaj në Itali”(Amsi) dhe i Bashkësisë
së botës arabe në Itali (Comai), duke komentuar fjalët e Papës, i cili dje, gjatë
lutjes së Engjëllit të Tënzot, u bëri thirrje të krishterëve e myslimanëve ta respektojnë
njëri-tjetrin. Duke folur në telefon nga fshati i tij i lindjes, pranë Tel Avivit,
ku ndodhet për festën e përfundimit të Ramazanit, palestinezi Aodi tregon se në këto
ditë pushimi, shumë të afërm e miq e pyetën për Papën Françesku, që po vlerësohet
gjithnjë më shumë në këto ana. Bota arabe kalon fazën më të vështirë të historisë
së saj, pohon kryetari i Comai. Shpresojmë se do të gjindet një personalitet arab
me vlerë e me profil të lartë, i cili do të mund të bëjë në botën arabe, atë, që po
bën Papa Françesku në Perëndim, që do të dijë ta bashkojë e ta bëjë të arsyetojë botën
arabe, në mënyrë që të rigjejë paqen e identitetin, shton Aodi. Kur Benedikti XVI
dha dorëheqjen, shpresoja se do të ulej në fronin e Shën Pjetrit një papë arab, vijon
kryetari i Comai, por tani shikoj se Papa Françesku po i jep përgjigjet, që i prisnim
prej vitesh. Përgjigje, të cilat prekin drejtpërdrejt zemrat. Kthesa e madhe u pa
që në fillim. Çdo ditë shikojmë thjeshtësinë e tij, dashurinë e madhe për njeriun
e njerëzimin e edhe gatishmërinë e Papës Françesku për dialog me të gjitha fetë e,
sidomos, me botën myslimane, që e priste prej vitesh një kthesë kaq të madhe. Aodi
i shpreh mirënjohjen e tij Papës Françesku për mesazhet drejtuar botës myslimane,
duke kujtuar, me emocion, edhe vizitën në Lampeduzë.