Alarm në Egjipt për diskriminimin e të krishterëve, me mijëra ikin nga vendi

Nga një çast në tjetrin, në Egjipt, mund të fillojë operacioni i shpërndarjes së militantëve të Partisë “Vëllezërit Myslimanë”, të cilët prej ditësh manifestojnë për të shprehur përkrahjen ndaj ish-presidentit Morsi. Tensioni është tepër i lartë e mund të ketë ndeshje të përgjakshme në sheshe. Ndërkaq, të krishterët, që përbëjnë 10% të popullsisë, largohen nga vendi, të frikësuar nga diskriminimet e shumta, siç nënvizon në mikrofonin tonë zëdhënësja e organizatës kishtare “Ndihmë për Kishën që vuan”, Marta Petrozilo:
Bashkësia e krishterë në Egjiptin e sotëm, është seriozisht e shqetësuar, pasi frika se do të përdorej si “kurban” për të shuar nervozizmin dhe dëshirën e “Vëllezërve Myslimanë” për hakmarrje, po bëhet reale. Mbi një kishë, u ngrit flamuri i Al Kaedës, ndërsa besimtarët luteshin brenda; u vra një meshtar në Sinai e vetëm pak muaj më parë, dy fëmijë u akuzuan për blasfemi, për të cilën nuk ishte folur kurrë para ardhjes në pushtet të “Vëllezërve Myslimanë”. Edhe Kushtetuta e re i dha një goditje të fortë bashkësisë së krishterë: Kishat kristiane tërhoqën përfaqësuesit nga Asambleja Kushtetuese, sepse teksti u hapte rrugën diskriminimeve.
Përkrahësit e kësaj partie i akuzojnë të krishterët se kontribuan në rrëzimin e qeverisë së presidentit Morsi. Cili është qëndrimi i Kishës Katolike?
Kisha nuk i ka ndaluar të krishterët të marrin pjesë në manifestimet kundër Morsit. Secili është i lirë të dalë ose jo në shesh. Sigurisht, bashkësia e krishterë ka pasur dyshime që në fillim: vitin e kaluar, në qershor, kur u zhvillua ballotazhi ndërmjet Morsit dhe gjeneralit Shafik, pjesa më e madhe e të krishterëve votuan për Shafikun… Megjithëse kontrolli i ushtrisë mund ta kufizojë disi lirinë, një parti ekstremiste mund të sjellë kufizime më të mëdha për lirinë fetare. Faktikisht, të krishterët konsiderohen “bashkësi e dorës së dytë”.
Jo pak, por 16 organizata egjiptiane për të drejtat e njeriut i kanë akuzuar autoritetet se nuk e mbrojnë sa duhet këtë bashkësi, si përsa i përket sigurisë fizike, ashtu edhe përsa i përket shprehjes së lirë të fesë…
Fatkeqësisht, është e vërtetë. Sigurisht, me një gjendje kaotike, si ajo e Egjiptit të sotëm, është e vështirë të garantohet siguria e të krishterëve, të cilët, duke qenë pakicë, janë edhe më të pambrojtur. Por kjo nuk është gjendje, që del në pah tani. Prej shumë vitesh, koptët largohen nga Egjipti. Vështirë të bëhen llogari të sakta, por flitet për 100 mijë të krishterë, që e kanë braktisur vendin nga frika.