Касцёл у Аргентыне супраць злоўжывання вобразам папы Францішка
Рэзкай крытыцы за
выкарыстанне вобразу папы Францішка падчас выбарчай кампаніі ў Аргентыне падверг кіруючую
партыю “Фронт за перамогу” арцыбіскуп Буэнас-Айрэса Марыа Полі. Фотаздымкі Пантыфіка
віднеюцца паўсюль ў Аргентыне на перадвыбарчых плакатах. “Папа не хацеў бы, каб усё
заканчвалася на плакатах, але, каб яго пасланне было пачута”, - сказаў наступнік кардынала
Берголіа падчас урачыстасцяў у санктуарыі св. Каетана у сталічным прыгарадзе.
Папа
змешчаны на плакатах разам з асноўным кандыдатам кіруючай у Аргентыне партыі Марцінам
Ісаўральдэ і прэзідэнтам Крысцінай Фернандэс дэ Кіршнэр, якія сустракаліся з Пантыфікам
на Сусветных днях моладзі ў Рыа-дэ-Жанейра. Апрача таго на плакатах выкарыстаны словы
Францішка. Апазіцыя ўжо абвясціла аб прымяненні юрыдычных працэдур, каб прадухіліць
несанкцыянаванае выкарыстанне вобразу Папы ў палітычных мэтах.
Арцыбіскуп Полі
заклікаў прыкладаць больш намаганняў для “культуры сустрэчы”, тым больш, што ў Аргентыне
шмат чаго не адпавядае ёй. Іерарх спаслаўся на відэа-зварот папы Францішка, які быў
скіраваны да аргентынцаў у мінулую сераду. У ім Святы Айцец запрасіў фарміраваць “культуру
сустрэчы”, асабліва ў кантэксце “сямейных бязладзіц”, “праблем у асяроддзі” і “непрыемнасцяў
на працы”.