Tweet i Papës: të gjithë jemi enë balte, por në ne ruhet një thesar i pafund
NjëTweet i ri i Papës u duk sot në faqen e internetit @pontifex: “Të gjithë,
shkruan, jemi enë balte, të brishtë e të varfër, por në këto enë kemi një thesar të
pafund”. E kjo temë na kujton fjalët e Shën Palit në Letrën drejtuar Korintianëve,
kujtuar shpesh nga Papa, në muajt e parë të papnisë. I vetëdijshëm se është enë
balte, e megjithatë rojtar i një thesari të madh, që iu dhurua krejt falas. Ky është
ndjekësi i Krishtit përpara syve të Zotit. Papa Françesku ndalohet kështu tek Letra,
përmes së cilës Pali ua jep këtë shpjegim të krishterëve të Korintit. Që të gjithë
ta kenë të qartë se pushteti i jashtëzakonshëm i fesë është vepër e Zotit, shpjegon
Pali, ai u zbraz në njerëz mëkatarë, në enë balte. Por pikërisht nga lidhja ndërmjet
nesh, mëkatarëve të varfër dhe hirit e pushtetit të Jezu Krishtit, ripohon Papa, gurron
dialogu i shëlbimit. Krishti, ky është thesari, për të cilin krenohemi. Por, e kemi
në enë balte. Të krenohemi, prandaj, edhe për rrëfimin e mëkateve tona, na kujton
Ati i Shenjtë: “Pali foli shumë herë, si ta kishte refren, për mëkatet
e veta.’Po ju them këtë: unë, që isha persekutues i Kishës, që e përndoqa..’. Pali
rikthehet e rikujton pambarimisht mëkatin, ndjehet mëkatar. Por edhe në atë çast nuk
thotë: ‘Kam qenë, por tani jam shenjt’, jo, nuk e thotë. Përkundrazi, thotë: kam
një ferrë të shejtanit në korpin tim. Na tregon ligështinë e vet, mëkatin e vet. Është
mëkatar, që pranon Jezu Krishtin, që dialogon me Jezu Krishtin”(Homelia
në Shtëpinë e Shën Martës, 14 qershor 2013). Përvujtëria e të krishterit është
konkrete, vijon Papa Françesku. Prandaj, nëse i krishteri nuk arrin t’ia bëjë vetes
e as Kishës këtë rrëfim, diçka nuk shkon. E nëse nuk shkon i pari ta bësh rrëfimin
tënd, do të thotë se nuk mund ta kuptosh as bukurinë e shëlbimit, që na çon tek Jezusi. Mund
të ndodhë, na kujton Papa, që ata, të cilët e marrin këtë thesar, e dinë se janë gatuar
prej balte, por gjatë jetës i rrëmben entuziazmi aq, sa ta harrojnë këtë të vërtetë,
të harrojnë se në enën e tyre prej balte ruajnë dhuratën më të madhe. Kisha, pohon
Ati i Shenjtë, vuan shumë, sa herë që ndonjë nga të thirrurit për ta ruajtur thesarin
në enë balte, beson se është më i mirë, se nuk është i gatuar prej balte. Tundohet,
prandaj, ta lyejë e ta zbukurojë enën. Harron se jemi të brishtë, nga zanafilla e
deri në fund të fundit, e nga kjo nuk mund të shpëtojë askush. Na shpëton vetëm Jezusi,
në mënyrën e vet, që nuk është mënyrë njerëzore, sepse Zoti nuk di të lahet e të lyhet,
për t’i pëlqyer vetes. (Homelia në selinë e Sumaré, 25 korrik 2013). Zoti na
ndihmon ta ruajmë drejtpeshimin ndërmjet thesarit e enës e na jep hirin e turpit për
mëkatet tona, gjë që çon në përvujtërinë, për të cilën kanë nevojë të gjithë, e, veçanërisht,
meshtarët: “Kjo përvujtëri na kujton çdo ditë se nuk jemi ne ata, që e ndërtojnë
Mbretërinë e Hyjit, por është gjithnjë Hiri Hyjnor, që vepron në ne; përvujtëri, që
të nxit ta vësh gjithçka jo në shërbim të vetvetes e as të ideve vetjake, por në shërbim
të Krishtit e të Kishës, si enë balte, të brishta, të papërshtatshme, të pamjaftueshme,
por në të cilat ruhet thesari i pafund, të cilin e mbartim dhe e komunikojmë” (Homelia
në Kishën e Jezusit, 31 korrik 2013). Vetëm përvujtëria, pohon
Papa, mund të na bëjë ta kuptojmë bukurinë e shëlbimit, që sjell Jezusi: “Vëllezër,
ne kemi një thesar: këtë të Jezu Krishtit Shëlbues. Kryqi i Jezu Krishtit, ky është
thesari, për të cilin krenohemi. Por, e kemi në një enë balte. Të krenohemi edhe
për rrëfimin e mëkateve tona. E kështu dialogu është i krishterë e katolik: konkret,
sepse Shëlbimi i Jezu Krishtit është konkret, Jezu Krishti nuk na shëlboi me një ide,
me një program intelektual, jo! Na shpëtoi me korpin e vet, me konkretësinë e mishit
e të gjakut të vet. U përul, i bërë njeri, mish e gjak, deri në fund të fundit. Por
mund ta kuptojmë, mund ta marrim, vetëm në enë balte”(Homelia në Shtëpinë
e Shën Martës, 14 qershor 2013). E edhe Samaritania, që e takon
Jezusin e, pasi i flet, u tregon bashkëfshatarëve më parë mëkatet e veta, e pastaj
takimin me Zotin, sillet njëlloj si Pali. Unë besoj, vëren Papa Françesku, se kjo
grua duhet të jetë në qiell, sepse, siç thotë Manzoni: “Nuk kam gjetur askund që Zoti
të ketë nisur një mrekulli, e të mos e ketë përfunduar mirë”. E kjo mrekulli, që Krishti
e nisi, sigurisht duhet të ketë përfunduar mirë në qiell. T’i lutemi Hyjit, na nxit
Papa të na ndihmojë të jemi enë balte, për të mundur ta ruajmë e ta kuptojmë misterin
e lumnueshëm të Jezu Krishtit.