Ватыканскі кардынал на буйным літургічным кангрэсе
Кардынал Курт Кох
прымае ўдзел у Міжнародным літургічным кангрэсе, які праходзіць у гэтыя дні ў нямецкім
Вюрцбургу. Каля 300 тэолагаў з усяго свету сабраліся ў “Новым універсітэце” горада,
каб разважаць і дыскутаваць на тэму: “Літургічныя рэформы ў Цэрквах”. Арганізатарам
выступіла міжнародная экуменічная арганізацыя “Societas Liturgica”. Матывам для сустрэчы
стала 50-я гадавіна выдання Канстытуцыі аб літургіі ІІ Ватыканскага Сабору “Sacrosanctum
Concilium”, якая падштурхнула Касцёл да далёка ідучых рэформ.
Кангрэс пачаўся
5 жніўня вячэрнім экуменічным набажэнствам у катэдральным касцёле Вюрцбурга, у якім
прынялі ўдзел мясцовы каталіцкі біскуп Фрыдгельм Хофман, Евангеліцка-лютэранскі епіскап
Хайнрых Бэдфард-Штром і епіскап Евангеліцка-метадысцкай Царквы Розэмары Вэннэр. Падчас
казання біскуп Хофман звярнуў увагу на хрост, які звязвае хрысціян усіх канфесій.
Рэформа ў Касцёле – гэта не “акадэмічная гульня ў бісер”, заявіў каталіцкі біскуп,
мэта касцёльных рэформ – праз розныя формы адарацыі пранікнуць у глыбіню веры.
Старшыня
Папскай рады спрыяння хрысціянскаму адзінству кардынал Курт Кох выступіць на кангрэсе
з дакладам. У рамках форума прагучаць у цэлым каля 100 выступленняў на нямецкай, англійскай
і французскай мовах. Асноўнай іх тэмай стануць літургічныя рэформы, ініцыяваныя II
Ватыканскім Саборам. Гаворка пойдзе пра гістарычны і эклезіялагічны кантэкст рэформ,
іх крыніцы, тэалагічную аснову, культуру і мову, а таксама іх уздзеянне на касцёльную
архітэктуру і мастацтва.