Festa e Shën Caietanos, shqip Gajtani, në Buenos Ájres
Buenos Ájres kremtoi sot festën e Shën Gajtanit të Tienës, i njohur nga argjetinasit
me emrin Shën Cayetano, figurë shumë e dashur për njerëzit e varfër, banorë të shtëpive
të mjerimit. Çdo vit, më 7 gusht, shtegtarë të shumtë nisen drejt Shenjtërores së
Shën Gajtanit, në rrethinat e kryeqytetit argjentinas. Është një ngjarje, në të cilën
kardinali Bergolio mori pjesë gjithnjë, e me gëzim të madh. Sivjet po e kremton nga
ana tjetër e botës, me të njëjtin gëzim e të njëjtin devocion. Por, pse e kremtojnë
kaq shumë argjentinasit këtë festë? E pse Papa Françesku nuk mungoi kurrë në të kremten
e Shenjtit? Përgjigjet Xhani Valente, gazetar i agjencisë Fides, mik i vjetër
i Horhe Mario Bergolios:
Përgjigje: - Shën Gajtani i Tienës,
Shenjt italian, viçentin, u bë Pajtor i ‘bukës e i punës”. E shenjtërorja e tij, më
e dashura për njerëzit e punës. Kujtoj se në vitet e krizës, 2001-2002, pati një
shpërthim të vërtetë devocioni për këtë Shenjt. Shtegtonin drejt Tij jo vetëm punëtorët,
por edhe afaristët, që gjunjëzoheshin para Shenjtit, duke kërkuar hirin e kapërcimit
të vështirësive për fabrikat dhe ndërmarrjet në krizë. E pastaj, ajo që
ngjet në shenjtërore, është pak a shumë një lloj kaleidoskopi për të matur ndjeshmërinë
shoqërore, pikërisht atë, që sot vijon ta nënvizojë Bergolio Papë. Në shenjtërore
rrëfyestoret presin e përcjellin besimtarë 12 orë në ditë, e jo vetëm. Pranë tyre
janë mensat, që presin e përcjellin të uritur, pikat e mbledhjes së ilaçeve e të
veshmbathjeve e edhe të shpërndarjes së tyre. Në këtë vend, njeriu hyn i ngarkuar
me mëkate, e del me shpirt të pastër; hyn i uritur e del me bark plot, hyn pa tesha
në shtat, e del i veshur. Me këtë gjuhë flet Ungjilli në Shenjtëroren e Shenjtit të
të mjerëve, që e prekin me dorë mrekullinë e përditshme të këtij vendi shenjt. Madje
është organizuar edhe një ‘bankë’ me emrat e atyre, që kërkojnë punë, për të bërë
kështu, një zyrë të vogël pune.
Pyetje: - Ndonjë vit më parë, ju
ishin në Buenos Ájres pikërisht më 7 gusht, në Festën e Shën Gajtanit, së bashku me
kardinalin Bergolio: ç’mund të na tregoni për këtë ditë, përkrah Kardinalit, mes njerëzve
të tij?
Përgjigje: - Ishte viti 2008, kur e pata shoqëruar
në këtë festë, bashkë me tim bir. Për mua ishte një përvojë e paharrueshme. Festa
e Shenjtit ishte nga ato, në të cilat kardinali Bergolio nuk mungonte për asnjë arsye.
Çaste tejet të gëzueshme. Kardinali kryesonte Meshën. Kremtim emocionues, i shoqëruar
me një homeli të shkurtër, por që të mbetej gjatë në mendje. E pastaj, pas Meshe,
duhej përshkuar në drejtim të kundërt turma e pafundme, që vërshonte si përrua i rrëmbyer
drejt Shenjtërores. Qindra-mijëra besimtarë shkonin të luteshin para shtatores së
vogël të Shenjtit për ndjetet e tyre. Duke ecur kundër rrymës, kardinali Bergolio
ndalohej vazhdimisht, u fliste njerëzve, kishte një fjalë të mirë për secilin, qeshte
me fëmijët, bekonte rruzare, shtatore e deri barqet e grave shtatzëna.... Kur takonte
ndonjë grua me fëmijë të vegjël, e këtë e kujtoj mirë, sepse më preku, e pyeste gjithnjë
a i kishte pagëzuar të vegjëlit. E nëse nuk ishin pagëzuar akoma, i ftonte prindërit
t’ua jepnin sa më shpejt Sakramentin e parë të krishterë, sepse, thoshte: “Do t’u
bëjë mirë, do t’i ndihmojë të rriten mirë!”. Në një farë mënyre tani, një sjellje
të tillë po e sodit mbarë bota. Njerëzimi shikon në Françeskun, bariun, që transmeton
në mënyrë gati fizike, gëzimin e të ungjillëzuarit, gëzimin që ndjen, kur ungjillëzon.