Kardinali Sandri: në lutje për atë Dal’Olion dhe për ipeshkvijtë e rrëmbyer në Siri
Ndërsa jezuitët e Lindjes së Mesme shprehin shqetësimin e tyre të thellë për atë Paolo
Dal’Olion, jezuitin romak të zhdukur para një jave në veri të Sirisë, ndoshta i rrëmbyer
nga grupe xhihadiste, edhe kardinali Leonardo Sandri, prefekti i Kongregatës për Kishat
Lindore, në një komunikatë, tregon afërsinë e tij me Shoqërinë e Jezusit e kërkon
lutje. Kujton mungesën e plotë të informacionit jo vetëm për atë Dal’Olion, por edhe
për dy ipeshkvijtë e dy meshtarët e rrëmbyer muaj më parë dhe përmend gjendjen e ngjashme,
në të cilën ndodhen edhe shumë të tjerë, të huaj e sirianë. Kardinali Sandri u kërkon
besimtarëve t’i luten Zotit për fatin e këtyre njerëzve dhe për fundin e luftës në
Siri. Ndërkaq, në komunikatën e jezuitëve vihet re se edhe njerëzit e strehuar
në rezidencën e urdhërit në Homs janë në rrezik. Sipas UNICEF-it, në këtë qytet, kanë
mbetur të bllokuar 400 mijë civilë për shkak të ofensivës së re të ushtrisë qeveritare
kundër milicive rebele. Eprori provincial i jezuitëve në Lindjen e Mesme, atë Viktor
Asuad kërkon të mos kursehen përpjekjet për t’u mbrojtur atyre jetën. “Jezuitët –
siguron ai – impenjohen ta vazhdojnë veprën e tyre humanitare për të gjithë, si edhe
punën për arritjen e paqes e të pajtimit në Siri”.