Թեհրանի Մէջ. Նախագահ Սլէյման Մասնակցեցաւ Ռուհանիի Նախագահական Երդման Արարողութեան
Հանրապետութեան նախագահ զօր. Միշել Սլէյման երէկ անձնական օդանաւով մեկնեցաւ Թեհրան,
ուր մասնակցեցաւ Իրանի նախագահ Հասան Ռուհանիի երդման արարողութեան: Նախագահ Սլէյմանի
ընկերակցեցան հրաժարեալ կառավարութեան փոխվարչապետ Սամիր Մուքպել եւ արտաքին գործոց նախարարի
պաշտօնակատար Ատնան Մանսուր: Կը նախատեսուէր, որ նախագահ Սլէյման Թեհրանի մէջ հանդիպումներ
ունենար Իրանի նախագահ Ռուհանիի եւ Իրանի գերագոյն հոգեւոր պետ այաթոլլա սէյիտ Ալի Խամենէիի
հետ: Նախագահ Սլէյման հանդիպումներուն ընթացքին պիտի շեշտէ Լիբանանը շրջանային տագնապներէն
չէզոք պահելու անհրաժեշտութիւնը: Ըստ «Հայաթ» օրաթերթին, նախագահ Սլէյման կը միտի
այցելել նաեւ Սէուտական Արաբիա: Միւս կողմէ, ներքին լիբանանեան առումով, նախագահական
պալատին մօտիկ աղբիւրներ յայտնեցին, որ կառավարութեան կազմութեան առումով նորութիւններ
չեն արձանագրուած: Նոյն աղբիւրները շեշտեցին, որ նախագահ Սլէյման կառավարութեան կազմութեան
առումով կը գործէ երեք մակարդակներու հիման վրայ. ա) Առանց նոր կառավարութեան մը կազմութեան
նախագահական ընտրութիւններ չկատարել` կանխարգիլելու համար անիշխանութիւնը, բ) կազմել
քաղաքական կառավարութիւն մը, որուն մաս կը կազմեն լիբանանեան քաղաքական բոլոր ուժերը,
գ) լիբանանեան համախոհական կառավարութեան մը կազմութեան արձանագրելիք ձախողութեան պարագային
պէտք է կազմել չէզոք կառավարութիւն մը: