Кардынал Джанфранка
Равазі прысвяціў свой артыкул на старонках італьянскага выдання “Il Sole 24 Ore” разважанням
аб месцы жанчыны ў жыцці Касцёла. Старшыня Папскай рады па культуры прааналізаваў
кнігу сястры Лізы Крэмаскі пад назвай “Жанчыны ў камуніі”, якая толькі-што з’явілася
на паліцах кніжных крамаў Італіі. У сваёй рэцензіі пурпурат звярнуў увагу на распаўсюджаны
стэрэатып пра прыніжаную ролю жанчыны ў хрысціянстве. Не закрываючы вочы на розныя
сітуацыі, якія здараліся ў гісторыі Касцёла, на яго думку, нельга забывацца і пра
тое, што часта як раз жанчыны з’яўляліся ў ёй галоўнымі дзеючымі асобамі.
Варта
памятаць, што Езус напачатку аб’явіўся жанчынам і даверыў ім заданне “евангелізаваць”
мужчын. Таму, напрыклад, Марыю Магдалену традыцыя называе “апосталам апосталаў”. Таксама
ў першых хрысціянскіх супольнасцях не было дыскрымінацыі па палавой прыкмеце: св.
Павел пісаў пра “апосталаў” Андроніка і Юнію, яго жонку, якая карысталася такой жа
павагай, як і яе муж. Ён падкрэсліваў роўнасць усіх у Езусе Хрысце: “Няма ўжо ні юдэя,
ні грэка; няма ні раба, ні свабоднага; няма ні мужчыны, ні жанчыны”.
Кардынал
Равазі нагадаў, што ранняя гісторыя Касцёла ведае дастаткова вялікіх жанчын, якія
вылучаліся асаблівымі інтэлектуальнымі здольнасцямі і глыбокай духоўнасцю, карысталіся
вялікай павагай і спрыялі навяртанню многіх мужчын.
Праблемай, на думку пурпурата,
былі і часы, калі дамінаванне мужчын не дазваляла жанчынам знайсці належнага месца
для сваёй рэалізацыі: так было ў сярэдневеччы. Кантэкст “вострага пытання” аб жаночым
святарстве і гендэрнай тэорыі трэба шукаць, паводле кардынала Равазі, у такога роду
канфліктах.
Пурпурат закончыў сваё разважанне словамі французскага паэта Альфрэда
дэ Віньі: “Пасля таго, як я добра падумаў аб лёсе жанчын усіх часоў і краін, пераканаўся,
што сёння мужчыны павінны вітаць іх словам “прабач”, замест “добры дзень”.
Трэба
адзначыць, што на ролю жанчын у Касцёле нядаўна звярнуў увагу і папа Францішак. Падчас
сваёй прэс-канферэнцыі на борце самалёта па дарозе з Рыа-дэ-Жанейра Пантыфік сказаў,
што “не можна зразумець Касцёла без жанчын” і нагадаў, што да гэтага часу не выпрацавана
дакладная “тэалогія жанчыны” і ў яго планах зрабіць гэта.