Kushtimi i Shën Marisë së Madhe: Zoja na ndihmon të synojmë gjithnjë më lart
Ditën e kushtimit, një ujëvarë petalesh, që zbret ngadalë nga tavani i Bazilikës romake
të Shën Marisë së Madhe, rikrijon mrekullinë, pas së cilës, në gjysmën e shekullit
IV, nisi ndërtimi i tempullit më të lashtë marian në Perëndim. Kishë shumë e dashur
për papët, e edhe për Papën Françesku.
“Do të më ndërtosh një Kishë, atje ku
nesër do të gjesh dëborë të freskët”. Mrekullia, pas së cilës, sipas traditës, nisi
ndërtimi i Shën Marisë së Madhe, nisi natën para kësaj ngjarjeje të pashembullt. Të
mendosh për flokë dëbore, në Romën e përvëluar, në shekuj, nga vapa e gushtit, sot
do të dukej lojë e natyrës, për t’u tallur me njerëzit. E jo ndryshe duhet të ketë
qenë edhe në Romën e Perandorisë së vonë. Por pikërisht këtë ‘lojë’ Zoja e Bekuar
ua kujtoi njëkohësisht në ëndërr, natën e 4 gushtit të vitit 358, Papës Liberi e një
farë Gjoni, patric i Romës: të ndërtonin një kishë, pikërisht në atë vend, që të nesërmën
do ta gjenin të mbuluar me dëborë të freskët. Në ag të 5 gushtit Gjoni vrapoi
tek Papa Liberi për t’i treguar vegimin e çuditshëm mbrëmësor. E vetëm pak çaste pas
këtij rrëfimi, lajmi i mrekullisë: kodra e Eskuilinit ishte zbardhur nga dëbora e
gushtit. Tradita rrëfen se pikërisht mbi këtë dëborë Papa skicoi perimetrin e Kishës,
ndërtimin e së cilës e financoi Gjoni i pasur. Ndërtesa, që sot admirohet nga mbarë
bota, u ngrit nga Siksti III, në vitin 431, mbi themelet e bazilikës së dëborës, për
të skalitur, kështu, në gur, çka ishte shkruar mbi kartë nga Koncili i Efezit, domethënë
se Virgjëra Mari është Nëna e Zotit. Për shekuj, pastaj, bazilika, e treta që quhet
papnore, u zgjerua e u zbukurua nga arti i mjeshtrave të penelit e të skalitjes.
Duke nisur nga Papa Liberi, s’ka pasur papë, që nuk la një shenjë devocioni në këtë
tempull. E natyrisht, nga ky devocion nuk përjashtohet as Papa Françesku, që shkeli
këtu ditën e dytë të papnisë së tij, e përsëri menjëherë pas kthimit nga DBR-ja e
Rios, pa harruar vizitën e 4 majit, kur tha këtu Rruzaren, shoqëruar me një reflektim
për kuptimin e amësisë: “Nëna i ndihmon fëmijët të rriten e dëshiron të rriten
mirë; prandaj i edukon të mos jenë përtacë, pasojë edhe e mirëqenies, të mos mësohen
me jetë të rehatshme e të mos kënaqen vetëm me sendet. Nëna ka kujdes që fëmijët të
rriten gjithnjë më shumë, të rriten të fortë, të aftë për të marrë mbi vete përgjegjësi,
për t’u impenjuar në jetë, për të synuar ideale të larta. Këtë bën edhe Zoja, na ndihmon
të rritemi si njerëz e si besimtarë, të jemi të fortë e të mos i nënshtrohemi tundimit
për të qenë njerëz e të krishterë të cekët, por për të jetuar me përgjegjësi, për
të synuar gjithnjë më lart” (Rruzarja në Shën Marinë e Madhe, 4 maj 2013). Në
kapelën e famshme Paoline, në këtë Bazilikë, ndodhet një ikonë e mrekullueshme, tepër
e dashur për Qytetin e amshuar, Shpëtimtarja e Popujve Romakë, që edhe Papa Françesku
e nderon fort: “Shpëtimtarja e popujve romakë është Nëna, që na jep shëndet
në rritje; na jep shëndet, në përballimin dhe kapërcimin e problemeve; na jep shëndet,
për të qenë të lirë në vendimet përfundimtare; është Nëna, që na mëson të jemi plot
fryte, t’ia hapim portat jetës e së mirës, të mos e humbasim kurrë shpresën, t’u japim
jetë të tjerëve, jetë fizike e shpirtërore” (Rruzarja në Shën Marinë e
Madhe, 4 maj 2013).