Блізкі сябар Папы: ён быў Францішкам яшчэ ў Буэнас-Айрэсе
“Сваімі словамі і
жэстамі Папа паказвае, што ў пятровым служэнні фундаментальнай з’яўляецца ўвага да
бедных”, - такога меркавання прытрымліваецца бразільскі кардынал Клаўдзіу Хумэс, былы
прэфект Кангрэгацыі па справах духавенства і блізкі сябар папы Францішка. Менавіта
ён, сядзеў побач з кардыналам Берголіа у момант яго абрання на пасаду Біскупа Рыма.
“Не забывай пра бедных”, - з такімі словамі кардынал Хумэс звярнуўся тады да новаабранага
Папы, пра што апошні расказаў журналістам праз некалькі дзён пасля канклаву. У інтэрв’ю
“L’Osservatore Romano” пурпурат падзяліўся, што клопат аб бедных, гэта стыль жыцця
Святога Айца. “Ён быў Францішкам ужо ў Буэнас-Айрэсе. Усё яго жыццё было і працягвае
быць моцным пасланнем ў гэтым сэнсе. Тое, што ён зрабіў для Аргентыны, а затым для
ўсёй Лацінскай Амерыкі (...) ён робіць цяпер для Паўсюднага Касцёла”, - сказаў былы
арцыбіскуп Сан-Паўлу.
Паводле бразільскага кардынала, адкрываючы сэрцы Папа
паказвае якім шляхам хоча весці Касцёл,. “Яго жэсты, спосаб уваходу ў адносіны з людзьмі
(...) прывялі яго да тых, хто жыве на “перыферыях”: да людзей, якія знаходзяцца ў
патрэбе, пакутуюць, да бедных”, - падкрэсліў пурпурат.
Кардынал Хумэс адзначыў,
што папа Францішак з прастатой вучыць усіх нас, што варта працаваць не толькі дзеля
вялікіх праектаў, але клапаціцца таксама пра тых, хто жыве побач з намі, нашых блізкіх,
у якіх трэба бачыць чалавечае а не лічыць іх проста “лічбамі”.