Երեւանի Մաշտոցեան Պետական Մատենադարանի Աշխատակիցներ Զմմառու Մէջ։
Լիբանան - Զմմառու Արծիւեան միաբանութեան մեծաւոր` Հայր Գաբրիէլ Թ.Ծ.Վ 30 յուլիս թուակիր
նամակով կը տեղեկացնէ թէ վերջերս ''սկիզբ առած են Զմմառու վանքի չցուցակագրուած ձեռագիրներու
նկարագրութեան եւ ձեռագրացուցակի պատրաստութեան աշխատանքները, ըստ Մաշտոցեան Մատենադարանի
և Զմմառու վանքի միջեւ ստորագրուած գործակցութեան այն համաձայնագրին, որ Հայաստանի Հանրապետութեան
Վսեմաշուք Պրն. Նախագահի Զմմառու վանք անդրանիկ այցելութեան առիթով կնքուեցաւ 27 Նոյեմբեր
2012-ին, Երեւանի Մաշտոցեան Պետական Մատենադարանի Տնօրէն Տիար Հրաչեայ Թամրազեանի և Զմմառու
Պատրիարքական Կղերի Միաբանութեան Ընդհանուր Փոխանորդ Գերպծ. Գաբրիէլ Թ.Ծ.Վ. Մուրատեանի
կողմէ: ''
Նամակին մէջ կը նշուի նաեւ թէ ''Միաբանութիւնս 26 Յուլիս 2013-էն մինչեւ
9 Օգոստոս 2013, Զմմառու վանքին մէջ սիրով հիւրընկալած է Մաշտոցեան Մատենադարանի ձեռագրերու
հետազօտական հիմնարկի եօթը մասնագէտներ, որոնցմէ մաս մը կը զբաղին ձեռագիրներու նկարագրութեան
աշխատանքով, առաջնորդութեամբ իրենց պատասխանատու՝ Մաշտոցեան Մատենադարանի գլխաւոր աւանդապահ Պրն.
Գէորգ Տէր-Վարդանեանի:
Տակաւին չնկարագրուած Զմմառեան 1072 ձեռագրերու թուայնացուած
CD-ներուն օրինակները պատճէնահանուեցան համակարգչային տարողունակ կրիչի (External Hard
Drive) վրայ, և այդ կրիչը յանձնուեցաւ Պրն. Գէորգ Տէր-Վարդանեանին, որպէսզի աշխատանքը
կարելի ըլլայ յետագային շարունակել և ամբողջացնել Երեւանի մէջ: