Եգիպտական Կառավարութիւնը Կը Հրամայէ Գահիրէի Մէջ Իսլամականներու «Անընդունելի» Նստացոյցերը
Ցրուել
Իսլամականներու «Անընդունելի» Նստացոյցերը Ցրուել Եգիպտոսի նախարարաց խորհուրդը երկրին
ներքին գործոց նախարարութեան պարտականութիւն տուաւ Գահիրէի մէջ իսլամականներու նստացոյցերը
ցրուելու` յայտնելով, որ անոնց շարունակումը «այլեւս դադրած է ընդունելի ըլլալէ»: Կառավարութիւնը
իր հրապարակած հաղորդագրութեան մէջ յայտնեց, որ (Ռապիա Ատուիյա եւ Նահտա հրապարակներուն
վրայ) «վտանգաւոր կացութեանց շարունակումը եւ անոնց հետեւող ահաբեկչական արարքներն ու
ճամբաներու փակումը այլեւս դադրած են ընդունելի ըլլալէ»` աւելցնելով, որ որոշուած է այդ
վտանգներուն վերջ տալու առնչութեամբ միջոցառումներ որդեգրել եւ ներքին գործոց նախարարին
պարտականութիւն տրուած է «օրէնքի ծիրին մէջ այդ հարցով անհրաժեշտ որոշումները որդեգրելու»:
Նշենք, որ Եգիպտոս երէկ Իսլամ եղբայրներու ընդհանուր առաջնորդը դատարան փոխանցեց: Քեթրին
Էշթըն վստահեցուց, որ Եւրոպական Միութիւնը անհրաժեշտ կը նկատէ Եգիպտոսի մէջ ժողովրդավարական
հոլովոյթին վերադարձը եւ բոլոր տեսակի բռնարարքներու մերժումը, եւ այդ մէկը եգիպտացի
պաշտօնատարներուն յայտնած է: Աւելի ուշ, Էշթընի բանբերը յայտարարեց, որ ան պատրաստ
է Եգիպտոս վերադառնալ օժանդակելու համար տագնապի լուծման: Թուրքիոյ արտաքին գործոց
նախարար Ահմեթ Տաւութօղլու ըսաւ, որ Անգարա պատրաստ է Եգիպտոսի մէջ փոխանցման հանգրուանը
ամբողջացնելու եւ իշխանութիւնը ընտրովի իշխանութեան մը փոխանցելու ձգտող բոլոր տեսակի
նախաձեռնութեանց աջակցութիւնը ամրապնդելու: Եգիպտոսի նախագահի խորհրդական Սաքինա Ֆուատ
յայտարարեց, որ «Միացեալ Նահանգներու դեսպանը փորձեց Եգիպտոսի մէջ փաքիստանեան բնորդը
կիրարկել, սակայն ժողովուրդն ու բանակը սիոնա-ամերիկեան ծրագիրը տապալեցին»: