У доўгім, спакойным
і адкрытым інтэрв’ю, якое папа Францішак даў журналістам падчас пералёту з Рыа-дэ-Жанейра
ў Рым, былі закрануты дзве тэмы, якім да гэта часу Пантыфік не ўдзяляў такой увагі
– роля жанчын у Касцёле і гомасексуалізм. На гэты факт звярнула ўвагу журналістка
“L’Osservarote Romano” Лючэта Скарафія. Паводле яе, Святы Айцец разумее, што жанчыны
неабходны ў тым “жывым і адкрытым Касцёле”, якога ён жадае і “які зможа па-новаму
прыцягнуць вернікаў і запаліць іх сэрцы”. Францішак лічыць, што жанчына “дапамагае
Касцёлу расці”, а Марыя – “самая важная сярод апосталаў”. У той жа час ён катэгарычна
супраць жаночага святарства. Замест спекуляцый на гэту тэму, Папа заклікае глыбей
паразважаць аб рэалізацыі роўнасці палоў у іх адметнасцях. Лючэта Скарафія звярнула
ўвагу, што гаворачы пра людзей з гомасексуальнай арыентацыяй Папа казаў па-новаму,
але “не пагражаючы традыцыі Касцёла”. “Можна змяніць усё, не змяняючы базавых правілаў,
тых, на якіх пабудавана каталіцкая традыцыя”, - падкрэсліла журналістка.
Яна
нагадала словы Францішка пра тое, што Касцёл павінен быць заўсёды гатовы прыняць грэшнікаў
– гэта значыць усіх нас. “Ён нагадвае усім, што хрысціянства заўсёды адрознівала асуджэнне
граху і міларэснасць у адносінах да грэшніка”, пры гэтым без “строгага безсардэчнага
пурытанства”, - напісала Скарафія. Яна дадала, што сваімі словамі пра людзей з гомасексуальнай
арыентацыяй Францішак выключае “наракальнае маралізатарства” і вызваляе Каталіцкі
Касцёл ад ганебных абвінавачванняў у гамафобіі ў свой адрас, чаму ён падвяргаецца
на працягу апошніх гадоў. “Міласэрнасць – гэта характэрная рыса, якая адрознівае хрысціян
і заключаецца ў прыняцці грэшніка і прабачэнні”, - нагадала аўтар артыкула ў ватыканскай
газеце і дадала, што гэта не мае нічога супольнага з адмаўленнем існавання граху.