Հովանաւորութեամբ առաջնորդ Յովնան արք. Տէրտէրեանի, Սրբոց Ղեւոնդեանց Մայր տաճարի երկսեռ
դպրաց դաս երգչախումբի կատարողութեամբ, ղեկավարութեամբ Ստեփան սրկ. Կէօզիւմեանի, դաշնաւորումով
եւ երաժշտական այլ գործիքներու ընկերակցութեամբ Մաժակ Թօշիկեանի, «Կոմիտասեան Քառաձայն
Սուրբ Պատարագ»-ի երգեցողութեան խտասալիկը առաջին անգամ ըլլալով պիտի ներկայացուի հանրութեան:
Այս մասին կը տեղեկացնէ ԱՄՆ-ի «Ասպարէզ» օրաթերթը: Ձեռնարկը տեղի պիտի ունենայ Հինգշաբթի,
Օգոստոս 15-ին, երեկոյեան ժամը 8ին, առաջնորդարանի «Նազարէթ եւ Սիմա Գալայճեան» սրահին
մէջ: Այս առիթով, Ստեփան սրկ. Կէօզիւմեան բացատրութիւններ պիտի տայ խտասալիկի պատրաստութեան
եւ բովանդակութեան մասին. պիտի ունկնդրուին նաեւ կարգ մը բաժիններ սոյն խտասալիկէն: Ձեռնարկի
աւարտին տեղի պիտի ունենայ հիւրասիրութիւն: