Dorëheqja e ipeshkvijve të Mariborit e të Lubjanës. Nunciatura: shpresë për përtëritjen
e Kishës sllovene
Papa Françesku ka pranuar dorëheqjen e qeverisjes baritore të kryeipeshkvit të Mariborit
imzot Marjan Turnsek, e dorëheqjen e kryeipeshkvit të Lubjanës, imzot Anton Stres,
në përkim me paragrafin 2 të normës 401 të së Drejtës Kanonike Kishtare. Vendimi –
njofton nunciatura apostolike në Slloveni – është marr “për motive të rënda të gjendjes
ekonomike në të cilën gjendet kryeipeshkvija e Mariborit e me shpresë që dorëheqja
e tyre do të ndihmojë në përtëritjen e jetës së Kishës në Slloveni ”. Për të siguruar
qeverisjen e rregullte të dyja dioqezave – vijon nunciatura – Papa ka emëruar ipeshkvin
e Novo Mestos, imzot Andrej Glavan, administrator apostolik të kryedioqezës së Lubjanës,
e ipeshkvin e Celjes, imzot Stanislav Lipovsek, administrator apostolik të kryedioqezës
së Mariborit.