Моладзь падчас абеду пыталася Святога Айца пра сваю будучыню
У пятніцу 26 ліпеня
ў арцыбіскупскім палацы Рыа-дэ-Жанейра папа Францішак паабедаў разам з групай з 12
маладых пілігрымаў, якія прыбылі на Сусветныя дні моладзі – прадстаўнікоў розных кантынентаў
і краін. Сярод гасцей Святога Айца была таксама маладая расіянка з Санкт-Пецярбурга
Паліна Грыгор’ева. У інтэрв’ю Ватыканскаму радыё яна распавяла аб гэтым незвычайным
запрашэнні і размове са Святым Айцом. Паліна прызналася, што недзе тыдзень таму атрымала
е-мэйл з пазнакай “цалкам сакрэтна” і запрашэннем прыняць удзел у абедзе з Папам.
“Спачатку я падумала, што гэта нейкі жарт”, - прызналася дзяўчына і дадала, што дагэтуль
не да канца верыць, што ёй выпаў такі шанец “паразмаўляць з Папам так доўга і так
блізка”.
“Трэба адзначыць, што я вельмі ўражана Папам. Я не чакала, што такі
публічны чалавек можа быць такім блізкім і настолькі разумець праблемы сучаснай моладзі.
Наша размова ў асноўным складалася з нашых пытанняў і адказаў Святога Айца. Нашы пытанні
падзяліліся паміж двума тэмамі: эканамічнай і рэлігійнай. Папа казаў аб тым, што сёння
вельмі важна не згубіць чалавечую складаючую нашай працы, бо шмат людзей зараз працуюць
выключна дзеля грашэй; і гэта складае для іх адзіную каштоўнасць. Паводле Папы, мы
павінны здзейсніць рэвалюцыю, бо ў руках моладзі будучыня. Мы павінны ісці па шляху
міласэрнасці і любові”, - распавяла Паліна Грыгор’ева.
Моладзь пацікавілася,
як можна быць блізкім да Хрыста не будучы святаром ці законнікам, калі трэба “дзяліць”
сваё сэрца паміж Богам і сям’ёй, працай, сябрамі. На што Папа адказаў, што блізкім
да Езуса можна і трэба быць праз тых, хто знаходзіцца побач. “Хрыста мы можам любіць,
толькі любячы сяброў”, - сказаў Пантыфік і дадаў, што сэрца хрысціяніна павінна быць
адкрытым для кожнага.
“Гэта была незвычайная падзея ў маім жыцці. Зараз я адчуваю
сябе адказнай, бо Папа сказаў мне, што будзе маліцца за Расію, каб яна яшчэ больш
прысвяціла сябе Божай Маці. Ён вельмі спадзяецца, што як небудзь да нас усё ж такі
даберыцца. І мы будзем маліцца аб гэтам”, - сказала дзяўчына.
Паліна прызналася,
што знаходзячыся ў Рыа яна адчула, што Касцёл – гэта малады арганізм, што гэта арганізм
адзіны. Ні на адным іншым мерапрыемстве такога маштабу не можна сустрэць столькі ветлівасці,
павагі, паразумення, такой любові адно да аднаго.