СДМ у Рыа-дэ-Жанейра – старт дадзены: паўмільёна моладзі разам
Вялікай Эўхарыстыяй
на знакамітым узбярэжжы Копакабана 23 ліпеня ўвечары (па мясцовым часе) адкрыліся
28-я Сусветныя дні моладзі ў Рыа-дэ-Жанейра. Нягледзячы на праліўны дождж і даволі
нізкую тэмпературу – 15 градусаў – па дадзеных паліцыі, у св. Імшы ўзялі ўдзел больш
за 500 тыс. маладых людзей з усяго свету. Маладыя вернікі весела махалі сцягамі сваіх
краін і спявалі. Эўхарыстыю, якую канцэлебравалі больш за 1500 святароў, біскупаў
і кардыналаў, узначаліў арцыбіскуп Рыа, Арані Жоао Тэмпеста. Яна праходзіла пад узмоцненай
аховай паліцыі і сіл бяспекі. Як адзначыў старшыня Папскай рады па справах свецкіх,
кардынал Станіслаў Рылка, падчас свайго прывітальнага слова на адкрыцці Сусветных
дзён моладзі, форум праз 26 гадоў вярнуўся ў Лацінскую Амерыку, якая, па словах іерарха,
з’яўляецца “кантынентам надзеі”. Ён заклікаў моладзь даверыць Хрысту свае планы на
будучыню, радасць і смутак, самыя цяжкія выбары, свае страхі і трывогі. “Маладосць
сама па сабе з’яўляецца вялізным багаццем: вы з’яўляецеся яго ўладальнікамі, і вы
павінны зрабіць яго плённым!”, - заклікаў ватыканскі кардынал. “Той, хто выбірае Хрыста,
не губляе нічога, абсалютна нічога, але – наадварот – здабывае ўсё і знаходзіць сапраўднае
шчасце і паўнату жыцця!”, - дадаў іерарх.
Святы Айцец традыцыйна не ўдзельнічаў
у адкрыцці форуму. Ён возьме ўдзел у іншых галоўных мерапрыемсттвах Дзён моладзі:
Крыжовым шляху, Вігіліі і заключнай св. Імшы, у якой, паводле апошніх ацэнак арганізатараў,
прыме ўдзел каля 1,5 млн. чалавек.
Арганізацыйны камітэт не выключае зніжэння
колькасці пілігрымаў з-за нетыпова халоднага для Рыа-дэ-Жанейра надвор’я: тэмпература
каля 15 градусаў апоўдні і халодны вецер з мора з’яўляюцца выключэннем для паўднёва-амерыканскага
горада. У некаторых раёнах Бразіліі ноччу былі зарэгістраваны ападкі ў выглядзе снега.
Па дадзеных сіноптыкаў такое надвор’е будзе панаваць на працягу некалькіх дзён.
Апошнія
Сусветныя дні моладзі на лацінаамерыканскім кантыненце прайшлі ў 1987 г. у сталіцы
Аргентыны Буэнас-Айрэсе. Гэта быў другі ў гісторыі моладзевы форум з моманту яго заснавання
ў 1985 г. папам Янам Паўлам II. Першыя Дні адбыліся ў Рыме ў 1985 г. Папская рада
па справах свецкіх з’яўляецца іх галоўным арганізатарам.