Папская рада па справах
сям’і паінфармавала на сваім сайце ў інтэрнэце, што папа Францішак два разы сустрэнецца
з сем’ямі, якія прыбудуць з цэлага свету ў Рым у рамках пілігрымкі Года веры. Пілігрымка
запланавана на апошнія выходныя кастрычніка. Паводле ватыканскай дыкастэрыі, у суботу
26 кастрычніка яе ўдзельнікі пройдуць вуліцамі Вечнага Гораду, пачынаючы з “Piazza
del Popolo” (Плошчы народаў), каб затым прыбыць на плошчу св. Пятра. Тут у другой
палове дня пройдзе сустрэча з Пантыфікам, падчас якой сем’і з цэлага свету падзеляцца
радасцю супольна вызнаванай веры і досведам шчасця сямейнага жыцця. Сустрэча завершыцца
27 кастрычніка св. Імшой, якую ўзначаліць Пантыфік на плошчы св. Пятра.
Папская
рада па справах сям’і паінфармавала, што на пілігрымку ў Рым запрошаны сем’і разам
з дзецьмі, бабулямі і дзядулямі. Свой ўдзел трэба пацвердзіць праз інтэрнэт на партале
дыкастэрыі да канца верасня гэтага года.