Անգարայի Եւ Անտիոքի Մէջ Հակակառավարական Ցոյցերը Կը Շարունակուին
Թուրքիոյ մէջ հակակառավարական ցոյցերու ալիքը կը շարունակուի: Թուրքիոյ մայրաքաղաք Անգարայի
եւ Անտիոք քաղաքներուն մէջ գիշերը անհանգիստ եղած է: «Արմենփրես»` վկայակոչելով «Սի.Էն.Էն.Թիւրք»-ը,
կը հաղորդէ, որ երկու քաղաքներուն մէջ ալ դէպքերուն միջամտած է ոստիկանութիւնը: Անտիոքի
մէջ տեղի ունեցած բողոքի ցոյցին ժամանակ մասնակիցները իրենց դժգոհութիւնը յայտնած են
ոստիկանութեան գործողութիւններու իբրեւ արդիւնք հերթական ցուցարարի` Ալի Իսմայիլ Քորքմազի
զոհուելուն առնչութեամբ: Բողոքի ցոյցին անգամ մը եւս միջամտած է ոստիկանութիւնը, որ
ցուցարարներուն կողմէ դիմաւորուած է քարերով եւ երկաթներով, որմէ ետք ոստիկանութիւնը
սկսած է օգտագործել ջրաշիթ մեքենաներ, ցուցարարները այրած են իրենց կառուցած պատնէշները: Անտիոքի
մէջ ցոյցերը արդէն չորրորդ օրն ըլլալով կը շարունակուին: Ալեքսանտրէթի նահանգապետ Ճելալէտտին
Լեքսիզ յայտնած է, որ այս օրերուն ընթացքին արձանագրուած է 25 վիրաւոր, որոնց շարքին
են նաեւ ոստիկաններ: 14 յուլիսի գիշերը անհանգիստ եղած է նաեւ մայրաքաղաք Անգարայի
մէջ, ուր ցուցարարներուն եւ ոստիկաններուն միջեւ արձանագրուած բախումին իբրեւ արդիւնք
երկու անձեր ձերբակալուած են: Նշենք, որ 28 մայիսին ոստիկաններուն եւ ցուցարարներուն
միջեւ ընթացք առած բախումներուն իբրեւ արդիւնք մինչեւ այժմ արձանագրուած է 6 զոհ եւ աւելի
քան 7500 վիրաւոր: Ըստ Թուրքիոյ ներքին գործոց նախարարութեան տուեալներուն, մինչեւ օրս
տեղի ունեցած հակակառավարական ցոյցերուն Թուրքիոյ 79 շրջաններէն մասնակցած է 2.5 միլիոն
մարդ: