«Միացեալ Նահանգներ Գերմանական Հողին Վրայ Պէտք Է Յարգեն Գերմանական Օրէնքները» Կ՛ըսէ
Մերքել
«Ռոյթըրզ» լրատու գործակալութիւնը կը հաղորդէ, որ Գերմանիոյ վարչապետ Անկելա Մերքել,
մեկնաբանելով «Սնոուտընի գործը», յայտնած է, որ Գերմանիա առաջարկած է հաստատել տուեալներու
պաշտպանութեան եւրոպական համաձայնագիր մը, որ հեռահաղորդակցութեան ընկերութիւններուն
պիտի պարտադրէ մանրամասն հաշուետուութիւններ ներկայացնել իրենց ծառայութեան մասին: Մերքել
աւելցուցած է, որ ելեկտրոնային «լրտեսութիւնը» պէտք չէ ոտնահարէ քաղաքացիներու իրաւունքները: «Գերմանիան
Միացեալ Նահանգներու հետ կը համագործակցի ահաբեկչութեան դէմ պայքարին մէջ, իսկ ամերիկեան
գաղտնի սպասարկութիւններու գործողութիւնները ուղղուած են ահաբեկչութիւնները կանխարգիլելու,
սակայն Միացեալ Նահանգներ գերմանական հողին վրայ պէտք է յարգեն գերմանական օրէնքները»,
ըսած է Գերմանիոյ վարչապետը: Ըստ Մերքելի, թեքնիք առումով հաւանական բոլոր գործիքները
եւ ձեւերը պէտք չէ օգտագործուին, որովհետեւ այդ պարագային «նպատակը միջոցները չ՛արդարացներ»: