“Аргкамітэт Сусветных
дзён моладзі ў Рыа-дэ-Жанейра працуе дзень і ноч, каб як найлепш сустрэць моладзь
з цэлага свету і Папу”,- расказаў радыё Ватыкана кардынал Cтаніслаў Рылка, старшыня
Папскай рады па справах свецкіх. Іерарх 11 ліпеня вярнуўся з паездкі па Бразіліі,
дзе на свае вочы назіраў апошні этап падрыхтовак. "Сусветныя дні моладзі заўсёды
нас уражваюць моццу радасці і надзеі, якія перадаюцца не толькі ўсяму Касцёлу, але
і цэламу свету. Натуральна, у Бразіліі - натхненне і ад прыбыцця першага ў гісторыі
Папы лацінаамерыканскага паходжання, які ўжо заваяваў сэрцы многіх людзей", - прызнаўся
пасланец з Ватыкану. Кардынал падзяліўся ўласным вялікім уражаннем ад гасціннасці
гаспадароў моладзевага свята, "шчодрасцю і спрытнасцю", з якімі ўсе адказныя за гатоўнасць,
уключаючы валанцёраў, працуюць у апошяй дэкадзе перад пачаткам сусветнага форуму.
Ён адзначыў, што падзеяй жывуць не толькі бразільскія дыяцэзіі, але і Паўсюдны Касцёл.
Перад урачыстым адкрыццём Дзён, літаральна праз некалькі дзён, пачнецца Місійны тыдзень,
падчас якога маладыя людзі з розных куткоў свету будуць гасцямі большай часткі дыяцэзій
Бразіліі. Кардынал падкрэсліў, што, прадстаўляючы аргкамітэт СДМ, ён перадае ўсім
удзельнікам пажаданне добра духоўна падрыхтавацца да сустрэчы з вернікамі-равеснікамі.
Кардынал Рылка адзначыў, што для начнога чування і заключнай Эўхарыстыі ў Рыа ўзведзена
пляцоўка значна большая, чым на мінулых Днях моладзі ў Мадрыдзе. Чакаецца, што ў Літургіі
прыме ўдзел не менш як 2 млн. вернікаў. Адносна агульнай сітуацыі ў Бразіліі старшыня
Папскай рады, які наведаў усе месцы, дзе будуць праходзіць падзеі форума каталіцкай
моладзі, запэўніў, што ўсё спакойна і добра кантралюецца. На заканчэнне кардынал
Рылка прыпомніў, што для Францішка праблемы і будучыня моладзі з'яўляецца прыарытэтам
Пантыфікату. Алена Мартэцкая