Bota myslimane ka filluar tashmë muajin e shenjtë të Ramazanit; kohë për të agjëruar,
për t’u lutur, për të bërë vepra të mira, për të falur.“Në emër të të gjithë të krishterëve
irakianë, u bëj urimet më të mira të gjithë myslimanëve e myslimaneve për fillimin
e muajit të bekuar të agjërimit”. Kështu u shkruan patriku kalde, Lui Rafael I Sako,
vëllezërve të islamit për fillimin e Ramazanit. Fortlumturia e Tij uron që kjo të
jetë kohë e paqes dhe e të mirave për gjithë vendin. Fryma, që krijon muaji i shenjtë,
duhet t’i shërbejë përdorimit të një gjuhe të re, asaj të dialogut, për zgjidhjen
e problemeve. Sepse, shton Patriku, jemi një bashkësi e vetme kombëtare, pavarësisht
nga ndryshimet.